इगतपुरी (नाशिक) : गोवंशाची अवैध वाहतूक करणाऱ्या तीन संशयित आरोपींना काही स्थानिक तरुणांनी 8 जूनला कसारा परिसरात बेदम मारहाण केली होती. मारहाणीनंतर तिघांपैकी एक व्यक्ती बेपत्ता झाला होता. आता ही बेपत्ता व्यक्ती इगतपुरी जवळील घाटणदेवी परिसरातील उंट दरीत मृत अवस्थेत सापडली आहे. या प्रकरणी खुनाचा गुन्हा दाखल करण्यात आला असून, पोलिसांनी मारहाण करणाऱ्या सहा संशयित आरोपींना ताब्यात घेतले आहे. न्यायालयाने या आरोपींना 17 जून पर्यंत पोलीस कोठडी सुनावली आहे.
गोवंश घेऊन जाणारा टेम्पो अडवून मारहाण : मिळालेल्या माहितीनुसार, 8 जूनला शहापूर तालुक्यातील विहिगाव येथून एका टेम्पोत तीन जण गोवंश घेऊन जात होते. यावेळी कारेगाव कडून आलेल्या 15 ते 20 जणांनी हा टेम्पो अडवून त्यांना मारहाण केली. टेम्पोतील तीन व्यक्तींपैकी अकील गुलाम गवंडी पळून गेला. उरलेल्या दोघांना या लोकांनी इगतपुरी जवळील घाटनदेवी मंदिरासमोर आणून पुन्हा मारहाण केली. टेम्पोतील लुकमान सुलेमान अन्सारी हा जीव वाचवण्यासाठी घाटनदेवी मंदिरासमोर असलेल्या उंट दरीच्या दिशेने पळाला. यानंतर या टोळक्याने टेम्पो व जखमी अतीश हर्षद पद्दी याला इगतपुरी पोलिसांच्या ताब्यात दिले. पोलिसांनी त्याला उपचारासाठी ग्रामीण रुग्णालयात दाखल केले.
6 संशयितांना अटक : 9 जूनला लुकमान अन्सारी गायब झाल्याची तक्रार इगतपुरी पोलीस ठाण्यात दाखल करण्यात आली. दुसऱ्या दिवशी 10 जूनला उंट दरीत लुकमानचा मृतदेह आढळून आला. कसारा येथील आपत्ती व्यवस्थापन टीमचे पाच तासांच्या प्रयत्ना नंतर मृतदेह बाहेर काढला. या घटनेनंतर इगतपुरी पोलिसांनी खुनाचा गुन्हा दाखल केला असून पप्पू उर्फ प्रदीप आडोळे, भास्कर भगत, विजय भागडे, चेतन सोनवणे, रुपेश जोशी, शेखर गायकवाड या संशयितांना अटक केली आहे.
गोवंशाची बेकायदा वाहतूक प्रकरणी देखील गुन्हा दाखल : संशयित आरोपींपैकी एकाच्या गाडीवर तो बजरंग दलाचा जिल्हाध्यक्ष असल्याचा उल्लेख आहे. या सर्वांना न्यायालयात हजर केले असता न्यायालयाने त्यांना 17 जून पर्यंत पोलीस कोठडी सुनावली आहे. तसेच गोवंशाची बेकायदा वाहतूक केल्या प्रकरणी अतीश हर्षद पद्दी, अकील गवंडी यांच्यावरही गुन्हा दाखल करण्यात आला आहे.
हेही वाचा :
