विधी शाखेच्या आवेदन पत्राची मुदत वाढवून द्यावी; नाशिकमध्ये मनसे विद्यार्थी सेनेचे लाक्षणिक उपोषण

काही दिवसांपासून राज्यातील विद्यार्थ्यांच्या परीक्षा होणार की नाही त्यामुळे मोठा संभ्रम निर्माण झाला होता. यातच पुणे विद्यापीठाकडून विधि शाखेच्या परीक्षा होणार असल्याचा निर्णय देण्यात आला. मात्र, यात ऑनलाइन आवेदन पत्राची मुदत कमी देण्यात आल्याने विधि शाखेचे अनेक विद्यार्थी आवेदनापासून वंचित राहिले आहेत.

नाशिक - विधी शाखेच्या आणि इतर ऑनलाईन आवेदन पत्राची मुदत वाढवून देण्यात यावी, या मागणीसाठी महाराष्ट्र नवनिर्माण विद्यार्थी सेनेच्यावतीने आज (शनिवारी) लाक्षणिक उपोषण करण्यात आले. तसेच गोरगरीब विद्यार्थ्यांची परीक्षा शुल्क माफ करण्यात यावे, अशी मागणीही यावेळी करण्यात आली. सावित्रीबाई फुले पुणे विद्यापीठाच्या नाशिक उपकेंद्राबाहेर हे लाक्षणिक उपोषण करण्यात आले.

काही दिवसांपासून राज्यातील विद्यार्थ्यांच्या परीक्षा होणार की नाही त्यामुळे मोठा संभ्रम निर्माण झाला होता. यातच पुणे विद्यापीठाकडून विधी शाखेच्या परीक्षा होणार असल्याचा निर्णय देण्यात आला. मात्र, यात ऑनलाईन आवेदन पत्राची मुदत कमी देण्यात आल्याने विधि शाखेचे अनेक विद्यार्थी आवेदनापासून वंचित राहिले आहेत.

गेल्या दोन महिन्यांहून अधिक काळापासून लागू असलेल्या संचारबंदीमुळे अनेक गोरगरीब कुटुंबांवर उपासमारीची वेळ ओढवली आहे. म्हणून गोरगरीब विद्यार्थ्यांना परीक्षा शुल्क माफ करण्यात यावे, अशी मागणी मनसे विद्यार्थी सेनेचे नितीन पंडित यांनी केली.

या विद्यार्थ्यांचे शैक्षणिक नुकसान होऊ शकते. म्हणून ऑनलाइन आवेदन पत्राची मुदत वाढवून देण्यात यावी, याच बरोबर गोरगरीब विद्यार्थ्यांना परीक्षा शुल्क माफ करण्यात यावे, या मागणीसाठी महाराष्ट्र नवनिर्माण विद्यार्थी सेनेच्या वतीने 15 जूनला निवेदन देण्यात आले होते. मात्र, या निवेदनाची दखल न घेण्यात आल्याने शनिवारी सावित्रीबाई फुले पुणे विद्यापीठाच्या नाशिक उपकेंद्राबाहेर लाक्षणिक उपोषण करण्यात आले.