नाशिक - नाशिक जिल्ह्यातील इगतपुरी तालुक्यातील आधारवाड गावात बिबट्याच्या हल्ल्यात चार वर्षीय जया चवर ही मुलगी गंभीर जखमी झाली होती. मात्र उपचारादरम्यान चार दिवसानंतर या चिमुकलीचा दुर्दैवी मृत्यू झाला आहे.
आधारवाड गावात आपल्या आजोबांच्या घरी आलेली जया चवर ही चार वर्षीय मुलगी इतर मुलांसोबत शेतातील घराबाहेर खेळत होती. शेतात दबा धरून बसलेल्या बिबट्याने अचानक जयावर हल्ला करत तिची मान जबड्यात पकडून तिला फरफटत शेतात घेऊन गेला. जयाचा ओरडण्याचा आवाज आल्यानंतर बाजूलाच शेतात काम करत असलेल्या मामाने प्रसंगावधन दाखवत तात्काळ बिबट्याच्या दिशेने धाव घेऊन दोनशे मीटर अंतरावर जाऊन बिबट्याच्या जबड्यातून जयाला ओढत आरडाओरडा केला. त्यानंतर बिबट्याने जयाला सोडून शेतात पळ काढला. या घटनेत जयाच्या मानेला पाठीला गंभीर जखमा झाल्या होत्या.
जयाला प्राथमिक उपचारासाठी घोटीतील ग्रामीण रुग्णालयात दाखल करण्यात आले. त्यानंतर नाशिकच्या जिल्हा शासकीय रुग्णालयात दाखल करण्यात आले होते. त्या ठिकाणीसुद्धा तिच्या प्रकृतीत सुधारणा होत नसल्याने तिला दुसऱ्या हॉस्पिटलमध्ये दाखल करण्यात आलं होतं. मात्र चिमुकलीच्या मानेवरील जखमा खोलवर असल्याने तिला झटके येत होते. अशात तिचा उपचारादरम्यान मृत्यू झाला.
आई तू ये ना...
इगतपुरी तालुक्यातील चार वर्षीय जया चवर हिच्यावर बिबट्याचा हल्ला झाल्यानंतर सुरवातीला तिला उपचारासाठी नाशिकच्या जिल्हा शासकीय रुग्णालयात दाखल करण्यात आलं होतं. ह्यावेळी तिच्याजवळ आजोबा आणि काका होते. सुरवातीला तिची प्रकृती स्थिर असल्याने ती सगळ्यांशी बोलत होती. आजोबांनी चिमुकली जयाचे आईशी फोन वर बोलणं करून दिल्यानंतर जयाने आकांताने "आई तू ये ना माझ्या जवळ" अस म्हणत आपलं आईवरील प्रेम व्यक्त केलं होतं. यावेळी आईने देखील तिच्या मुलीला फोनवरून धीर दिला होता.
वन विभागाने पिंजरा लावावा...
आधारवाड गावात याआधी बिबट्याने शेळ्या, मेंढ्या फस्त केल्या असून इगतपुरी तालुक्यातील बिबट्याच्या हल्ल्यात महिन्याभरात तीन जणांचा बळी गेला. गावातील नागरिकांमध्ये भीतीचे वातावरण आहे. या नरभक्षक बिबट्याला वन विभागने जेरबंद करण्यासाठी पिंजरा लावावा अशी, मागणी गावकऱ्यांनी केली आहे.
हेही वाचा- 'जैश'च्या दोन संशयित दहशतवाद्यांना अटक; दिल्ली पोलिसांच्या विशेष पथकाची कारवाई
हेही वाचा- महिलेचा गळा चिरून आरोपीने तोंडात फोडला सुतळी बॉम्ब; प्रेमसंबंधातून कृत्य
