नाशिक - सटाणा तालुक्यातील पठावे दिगर येथील आपटेपाडा आणि दरा शिवारातील जवळपास तीनशे नागरिकांचा गावाशी संपर्क तुटला आहे. यामुळे येथील तीस ते चाळीस शालेय विद्यार्थी देखील शिक्षणापासून वंचित राहत आहेत. दरम्यान, नदीचे पाणी काही प्रमाणात कमी झाल्यानंतर बंधाऱ्यावरून दोराच्या आधारने जीवघेणा प्रवास करून या विद्यार्थांना शाळेत यावे लागत आहे.
विद्यार्थ्यांना शाळेत जाण्यासाठी आणि ग्रामस्थांना गावात येण्यासाठी हत्ती नदीवर गाडघोसर शिवारतील बांधलेल्या केटिवेअर बंधाऱ्याचा वापर करावा लागतो. मात्र, बंधाऱ्यावरून जास्त प्रमाणात पाणी वाहत असल्यास नागरिकांना तासनतास पाणी कमी होण्याची वाट पाहावी लागते. दरम्यान, हा असा प्रवास करावा लागत असल्याने स्थानिकांना मागिल दोन महिन्यांपासून मोठ्या त्रासाला सामोरे जावे लागत आहे. तसेच विद्यार्थ्यांना महिनाभर शाळेला सुटी ध्यावी लागत आहे.
हेही वाचा - ईडीच्या माध्यमातून जे केले जाते ते अत्यंत दुर्दैवी - हेमंत टकले
पठावे दिगर परिसरात मोठ्या प्रमाणात डोंगर दऱ्या आणि जंगल आहे. यामुळे या भागात पाऊसही जास्त प्रमाणात पडतो. दरम्यान, हत्ती नदीचा प्रवाह इतका जोरदार आहे, की एके काळी या नदीतील प्रवाहात एक हत्ती वाहून गेल्याची दंतकथा येथे प्रसिद्ध आहे. यामुळेच या नदिला हत्ती नदी असे नाव पडले आहे. दरम्यान, या नदीला पार करतांना अनेक अपघात झालेत. मात्र, तरीही नाईलाजाने नागरिकांना हा जिवघेणा प्रवास करावा लागतो. निदान आता तरी प्रशासनाने या प्रश्नाचा गांभिर्याने विचार करुन येथे पूल बांधावा अशी नागरिकांची मागणी आहे.
हेही वाचा - फुकटच्या सल्ल्याची गरज नाही, अशोक चव्हाण यांचे तावडेंना प्रत्युत्तर
