नाशिक : अमरावती येथील एका कार्यक्रमात शिवप्रतिष्ठानचे प्रमुख संभाजी भिडे यांनी महात्मा गांधी, शिर्डीचे साईबाबा तसेच महात्मा ज्योतिराव फुले यांच्याबद्दल अपशब्द काढले होते. दरम्यान नाशिकरोड पोलीस ठाण्यात संभाजी भिडे यांच्याविरुद्ध गुन्हा दाखल करण्यात आला आहे. मात्र सदरचा प्रकार अमरावती येथे घडला असल्याने हा गुन्हा अमरावती पोलिसांकडे वर्ग करण्यात आला असल्याचे, नाशिक पोलीस ठाण्याच्या वरिष्ठ पोलीस निरीक्षकांनी सांगितले.
संभाजी भिडे यांचे वक्तव्य काय : संभाजी भिडे हे अमरावतीत असताना बोलले होते. यावेळी त्यांनी राष्ट्रपिता महात्मा गांधी यांच्याबद्दल वादग्रस्त वक्तव्य केले होते. महात्मा गांधी यांच्या चारित्र्यावरच त्यांनी शिंतोडे उडवले होते. त्यामुळे राज्यभरात काँग्रेस आक्रमक झाली आहे. संभाजी भिडे यांना अटक करण्याची मागणी काँग्रेसने लावून धरली आहे.
संभाजी भिडेंवर कारवाई झाली पाहिजे : संभाजी भिडेंवर कारवाई झाली पाहिजे, त्यांना अटक झाली पाहिजे त्याशिवाय हे सरळ होणार नाहीत. अत्यंत दुर्दैवाची गोष्ट ही आहे की, बहुजन समाजाचेच काही लोक मनोहर भिडेच्या मागे संभाजी भिडे असे करत फिरत आहेत. छत्रपती शिवरायांच्या महाराष्ट्रात हे दुर्दैवी आहे. राज्यात आणि देशात अशा प्रकारे वातावरण गढूळ करणारे हे जे प्रकरण आहे हे थांबले पाहिजे. कोणीही त्यांना पाठिशी घालता कामा नये असे मंत्री छगन भुजबळ यांनीही दोन दिवसांपूर्वी नाशिकमध्ये म्हटले होते.
राष्ट्रपुरुषांची बदनामी खपवून घेतली जाणार नाही : मनोहर कुलकर्णी उर्फ संभाजी भिडे यांच्याबाबत अमरावती जिल्ह्यातील राजापेठ पोलीस ठाण्यात गुन्हा दाखल करण्यात आला आहे. पोलीस चौकशी करत आहेत. मात्र कोणीही कोणत्याही राष्ट्रपुरुषांची केलेली बदनामी खपवून घेतली जाणार नाही. मग ती सावरकरांची असो की महात्मा गांधींची असे वक्तव्य उपमुख्यमंत्री देवेंद्र फडणवीस यांनी विधानसभेत केले.
हेही वाचा -
