नाशिक - कोरोनाविरोधात यशस्वीरीत्या लढण्याचे एक आगळेवेगळे उदाहरण मालेगाव शहराने सर्वांसमोर ठेवले आहे. त्याचाच पुढचा टप्पा म्हणून, बकरी ईद देखील अतिशय संयमाने साजरी करावी, असे आवाहन जिल्हाधिकारी सूरज मांढरे यांनी केले. मालेगाव येथील पोलीस अधिक्षक कार्यालयातील सुसंवाद हॉल येथे आयोजित शांतता समितीच्या बैठकीत ते बोलत होते.
आपण कोरोना साथीपासून दूर झालो असलो, तरी अजून त्याचा धोका टळलेला नाही. सर्वांनी नियमांचे पालन करुन योग्य ती खबरदारी घ्यावी, असे जिल्हाधिकारी मांढरे म्हणाले. मालेगाव पॅटर्न बाबत मला नेहमी विचारणा होते. त्या वेळेला आम्ही लोकांनी कोरोनाच्या भितीवर केलेली ही मात आहे, असे सांगतो. कोरोनासारख्या महामारीवर मालेगाव पॅटर्नने जे नावलौकीक मिळविले आहे. ते अबाधित राहण्यासाठी सर्वांचे सहकार्य आवश्यक असून आरोग्य प्रशासनाच्या सर्व सुचनांचे पालन होणे, आवश्यक आहे, असेही ते म्हणाले.
आज आपण पूर्णपणे कोरोनाच्या संकटातून बाहेर आलेलो नसून बकरी ईदच्या अनुषंगाने सार्वजनिक ठिकाणी कुर्बानी करु नये. सण आणि उत्सव हे जीवनाचा आनंद वाढविण्यासाठी असतात. आज एकीकडे कोरोनाची साथ झपाट्याने वाढते आहे. ती रोखण्याचे आटोकाट प्रयत्न आपण करीत आहोत. गेल्या चार महिन्यांत आपण सर्व धर्मियांचे सण मर्यादित प्रमाणात साजरे केले, त्याचप्रमाणे येणारी बकरी ईद देखील साधेपणाने साजरी करावी. महानगरपालिकेतर्फे आवश्यक व्यवस्था करण्यात आलेली आहे. प्रशासनामार्फत जी काही मदत लागेल, ती केली जाईल. तरी सर्वांनी शासनाच्या दिलेल्या नियमांचे यथोचित पालन करावे, असे आवाहन त्यांनी केले.
मुस्लीम बांधवाच्या बकरी ईदच्या अनुषंगाने पोलीस प्रशासनाचे संपूर्ण सहकार्य मिळेल. चोख पोलीस बंदोबस्त ठेवण्यात येईल. आपण शासनाच्या आदेशाचे पालन करुन घरातच बकरी ईद साजरी करावी. कोरोना संकटाचा मुकाबला करण्याचे मोठे आव्हान आहे. सध्याच्या काळात निरोगी जिवन जगणे हे महत्त्वाचे आहे, पोलीस अधिक्षक डॉ. आरती सिंह म्हणाल्या.
सण-उत्सव साजरा करताना गर्दी होणार नाही, याकडे लक्ष देणे आवश्यक आहे. तसेच वाहतुकीमुळे साथीचा रोग पसरण्याची शक्यता वाढते. त्यामुळे त्याचा विचार करावा. नागरिकांच्या तक्रारी सोडविण्यासाठी पोलीस प्रशासन तत्पर आहे, असे आरती सिंह म्हणाल्या. तसेच त्यांनी उपस्थितांना बकरी ईद निमित्ताने शुभेच्छा दिल्या.
आमदार मौलाना मुफ्ती इस्माईल यांनी बकरी ईदच्या संदर्भातील ऐतिहासिक दाखला देऊन बकरी ईद ही परमेश्वरावरील आपली श्रद्धा व्यक्त करण्याचे साधन असून आपली श्रीमंती दाखवण्यासाठी साधनसामग्रीचे प्रदर्शन करण्याचे साधन नाही, असे स्पष्ट केले. ते पुढे म्हणाले की, शहरासह संपूर्ण जगात महामारीचे संकट आहे. अशा परिस्थितीमध्ये सर्वसामान्य नागरिक आज आपल्या रोजीरोटीसाठी झगडत आहे. बकरी ईदचा सण साजरा करण्यासाठी शासनाने दिलेल्या निर्देशाचे पालन करून सण साजरा करण्यात येईल.
इतिहासातील सर्वात मोठ्या महामारीचा मुकाबला करण्यासाठी शासन, प्रशासन सर्वतोपरी सहकार्य करीत असून शासनाच्या मार्गदर्शक तत्वानुसार आज मालेगाव शहर कोरोनामुक्तीच्या दिशेने वाटचाल करीत असल्याचे ते यावेळी म्हणाले.
