नाशिक - जिल्ह्यातील चाडेगाव शिवारातील विहिरीत बिबट्या पडल्याची घटना गुरुवारी मध्यरात्रीच्या सुमारास घडली. या बिबट्याला पाहण्यासाठी बघ्यांची गर्दी झाली. गेल्या पंधरा दिवसात या भागात तीन बिबट्यांना जेरबंद करण्यास वनविभागाला यश आले होते. मात्र,अजूनही परिसरात बिबट्याचा वावर असल्याचं दिसून येतंय.
नाशिक रोड परिसरातील नारायण अरिंगळे यांच्या पाडेगाव परिसरात असलेल्या विहिरीमध्ये एक बिबट्या पडला असल्याची घटना समोर आली आहे. गुरुवारी मध्यरात्रीच्या सुमारास हा बिबट्या विहिरीत पडला असल्याची शक्यता वर्तवण्यात येत आहे. सकाळच्या सुमारास काही नागरिक या ठिकाणाहून जात असताना बिबट्या विहरीत पडल्याचे त्यांच्या निदर्शनास आले.
दारणा नदी काठी धुमाकूळ घातलेल्या बिबट्यांपैकी जेरबंद झालेला हा या महिन्यातील चौथा बिबट्या आहे. यापूर्वी तीन बिबट्याला जेरबंद करण्यात आले होते. विहरीत पडलेल्या बिबट्याला सुरक्षितरित्या बाहेर काढण्यासाठी वन विभागाचे प्रयत्न सुरू आहेत.
नाशिक रोड परिसरात गेल्या दोन महिन्यांपासून बिबट्यांनी धुमाकूळ घातला आहे. या बिबट्याच्या हल्ल्यांमध्ये नाशिक रोड परिसरातील विविध ठिकाणी चार जणांना आपला जीव गमवावा लागला होता. त्यानंतर वनविभागाने बिबट्यांना जेरबंद करण्यासाठी सर्वतोपरी प्रयत्न सुरू केले होते. त्यांना जेरबंद करण्यासाठी वनविभागाच्या वतीने परिसरात सुमारे 20 पिंजरे लावण्यात आले होते.
