नंदुरबार - नवापूर शहरात डासांचा प्रादुर्भाव वाढला असून दवाखान्यांमध्ये रुग्णांची संख्या वाढली आहे. वातावरणातील बदल आणि अतीपावसामुळे डेंग्युचे रुग्ण आढळून येत आहेत.
नवापूर शहर व लगतच्या कॉलनी परिसरांमध्ये मच्छरांचा प्रादुर्भाव गेल्या काही दिवसांपासून वाढला आहे. गल्लोगल्ली डास आढळत आहेत. यामुळे रुग्ण संख्येत वाढ होऊन दवाखान्यांमध्ये गर्दी होत आहे. ताप, थंडी, मलेरिया या आजारांचे रुग्णांमध्ये वाढ झाल्याची माहिती वैद्यकीय सूत्रांनी दिली आहे. जिल्हात काही दिवसांपासून पावसाचा जोर वाढला आहे. अती पावसामुळे ठिकठिकाणी पाणी साचून राहते. यामुळे डासांची मोठ्या प्रमाणात पैदास होत आहे.
हेही वाचा - नंदुरबारमध्ये झोपडीवर वीज कोसळली ; १ ठार
याबाबत आरोग्य विभागाकडून योग्य त्या उपाययोजना करण्याचे काम सुरू आहे. चांगल्या पाण्यात डेंग्युच्या डासांची वाढ होते. घरातच योग्य निगा राखली गेली तर डासांचा प्रादुर्भाव होणार नाही, अशी माहिती वैद्यकीय सूत्रांनी दिली. डासाच्या वाढत्या प्रादुर्भावाबाबत उपाययोजना करण्याची मागणी नागरिकांनी केली आहे.
हेही वाचा - रोपवाटिकेच्या कामात लाखो रुपयाचा भ्रष्टाचार; सरपंच ग्रामसेवकावर गुन्हा दाखल
