नंदुरबार - जिल्ह्यातील प्राथमिक व माध्यमिक शाळांना सोमवारपासून सुरुवात झाली. प्रत्येक शाळेत विद्यार्थ्यांचे मोठ्या उत्साहात स्वागत करण्यात येत होते. नवापूर तालुक्यातील भरडू येथे अनुदानित आश्रम शाळेतदेखील प्रवेश उत्सव कार्यक्रम साजरा करण्यात आला. यावेळी आदिवासी पारंपरिक ढोल वाजवून गावातून विद्यार्थ्यांनी प्रभातफेरी काढली.
तसेच ढोलच्या तालावर विद्यार्थ्यांनी पारंपरिक वेशभूषा धारण करत नृत्यही सादर केले. शाळा प्रशासनाद्वारे विद्यार्थ्यांचे पुष्पगुच्छ देऊन स्वागत करण्यात आले.
शाळेच्या पहिल्या दिवशीच शाळेच्या आवारात झाडे लावून प्रवेशोत्सव साजरा करण्यात आला. यावेळी शाळा प्रशासन, शिक्षक, विद्यार्थी, पालक तसेच प्रकल्प अधिकारीही या सोहळ्याला उपस्थित होते. शाळा प्रशासनाद्वारे पालक मेळाव्याचे आयोजन करून पालकांना व विद्यार्थ्यांना विशेष सूचना देण्यात आल्या.
