नंदुरबार - ओव्हरटेक करण्याच्या नादात पुढे धावणार्‍या दुचाकीला गुजरात राज्याच्या बसने धडक दिली. या अपघातात 1 तरुण जागीच ठार झाला आहे. ही घटना विसरवाडी-नंदुरबार रस्त्यावरील बोदवड गावाजवळ घडली. अंकुल उदेसिंग वसावा (वय 21, रा. नवा वडगाम ता. उच्छल) असे मृत तरुणाचे नाव आहे. तर जखमी झालेल्या दुसर्‍या तरुणावर विसरवाडी रुग्णालयात उपचार सुरु आहे. या प्रकरणी बस चालकाविरुध्द गुन्हा दाखल करण्यात आला आहे.
उच्छल येथील जयेश सखाराम वसावा, पंकज लक्ष्मण वसावा, हितेश ईश्‍वर वसावा, अंकुश उदेसिंग वसावा हे 4 मित्र 2 दुचाकींनी विसरवाडी येथे रुग्णालयात आले होते. चौघेही दुचाकींनी जात असताना विसरवाडी ते नंदुरबार रस्त्यादरम्यान समोरुन येणार्‍या गुजरात राज्याची बर्‍हाणपूर-सुरत एस.टी.बसने (क्र. जीजे 18-झेड 5677) चारचाकी गाडीला ओव्हरटेक करण्याच्या नादात दुचाकीला (क्रं.जी.जे.26-4015) धडक दिली. या अपघातात दुचाकीवरील अंकुल उदेसिंग वसावा (वय 21, रा. नवा वडगाम ता. उच्छल) हा तरुण जागीच ठार झाला. तसेच पंकज लक्ष्मण वसावा हा तरुण गंभीर जखमी झाला आहे. यावेळी जखमींना नागरीकांनी मदतकार्य करीत विसरवाडी ग्रामिण रुग्णालयात दाखल केले.
हेही वाचा - 'सात बारा कोरा करण्याचे सरकारचे उद्दिष्ट पूर्ण झाले नाही'
याबाबत जयेश सखाराम वसावा यांनी विसरवाडी पोलीस ठाण्यात फिर्याद दिली आहे. त्यानुसार बसचालक छोटू लुका पाटील याच्या विरुध्द गुन्हा दाखल करण्यात आला आहे. घटनास्थळी पोलीस उपनिरीक्षक चंद्रकांत शिंदे यांनी भेट दिली. तर पुढील तपास हेड कॉन्स्टेबल अरुण कोकणी, अतुल पान पाटील, प्रदिप वाघ करत आहेत.
