नंदुरबार : नवापूर-पिंपळनेर रस्त्यावरील चरणमाळ घाटात सोमवारी मध्यरात्री दोनच्या सुमारास बसवरील नियंत्रण सुटल्याने बस सुरक्षा भिंतीला आदळली. यात चार बालकांसह 16 प्रवासी जखमी झाले आहेत. तर सहचालकाचा घटनास्थळी मृत्यू झाला आहे. या अपघातात बसचे मोठे नुकसान झाले असून बस चालकाने घटनास्थळहून रात्रीच पळ काढल्याची माहिती मिळत आहे.
हेही वाचा- चिकन खाणे सुरक्षित, कोरोनाचा संसर्ग होत नाही- केंद्र सरकार
गुजरात राज्यातील सूरत येथील गरीबरथ खाजगी बस (जी.जे 14 एक्स 2250) धुळ्याहून लग्नकार्यकरुन सूरतला जात होती. दरम्यान, चरणमाळ घाटातील वळणावर बसचालकाचे नियंत्रण सुटले. बस रस्त्यावरील संरक्षण कठड्याला आदळली. बसमध्ये 30 ते 35 प्रवासी होते. यातील 16 जण जखमी झाले आहेत. त्यांच्यावर सूरत येथील रुग्णालयात उपचार सुरू आहेत. सर्व प्रवाशी सुरत येथील उन पाट्याचे रहिवासी आहेत. सहचालक शाहिद नजरी शाह (वय 24 रा. उन पाटिया सूरत गुजरात) याचा जागीच मृत्यू झाला.
दरम्यान, बसमधील प्रवाशांनी दिलेल्या माहितीनुसार, बस चालक दारुच्या नशेत मोठ्या आवाजाने संगीत ऐकून बस चालवत होता. अनेक वेळा बसमधील प्रवाशांनी वाहनचालकाला बस सावकाश चालवण्याची ताकीद दिली. परंतु, बस चालकाने कोणाचेही न ऐकता बस त्याच्या पद्धतीने चालवत राहिला.
बस मालकाची उडवाउडवीची माहिती..
बसमधील चालक, सहचालक कोणीच दारू पित नाही. बसचे ब्रेक फेल झाल्याने हा अपघात झाला. बसमधील एकही प्रवाशी जखमी झाला नाही. अशी उडवाउडवीची उत्तरे बसचे मालक मुसा शाह यांनी दिली.
एक लाख किंमतीची दागिण्याची बॅग चोरीला..
बसमधील जखमी प्रवासी कुर्बान गुलाब शहा (वय 29 रा. उन पाटीया सूरत) धुळे येथे पुतणीचा लग्नासाठी कुटुंबातील 16 सदस्यासह गेले होते. लग्न समारंभ करुन सूरत येथे बसमधून जात असताना चरणमाळ घाटात अपघात झाला. त्यांचा जवळ एक लाख किमतीची सोन्या-चांदीच्या दागिन्यांची बॅग होती. अपघात दरम्यान दागिन्यांची बॅग चोरीला गेली, अशी माहिती त्यांनी सूरत येथील पत्रकारांना दिली आहे. नवापूर पोलीस अपघाताचा तपास करीत आहे.
