नांदेड - जिल्हा परिषदेला प्रथमच मुख्य कार्यकारी अधिकारीपदी एक महिला अधिकारी लाभल्या आहेत. मुख्य कार्यकारी अधिकारीपदी सनदी अधिकारी वर्षा ठाकूर यांच्या नियुक्तीचे आदेश निर्गमित झाले आहेत. ठाकूर यांच्या नियुक्तीमुळे अध्यक्ष, उपाध्यक्ष आणि सीईओ महिला असण्याचा अनोखा योगायोग जुळून आलेला असून यानिमित्ताने नांदेड जिल्हा परिषदेत महिलाराज पाहावयास मिळणार आहे.
तत्कालीन मुख्य कार्यकारी अधिकारी अशोक काकडे यांची 17 मार्च रोजी बदली झाल्यापासून हे पद रिक्त होते. अतिरिक्त मुख्य कार्यकारी अधिकारी डॉ. शरद कुलकर्णी यांच्याकडे या पदाचा तात्पुरता पदभार देण्यात आला होता. काकडे यांच्या बदलीनंतरच्या काळामध्ये जिल्हा परिषदेच्या मुख्य कार्यकारी अधिकारीपदी अनेक नावांची चर्चा होती, त्यामध्ये वर्षा ठाकूर आणि शिवानंद टाकसाळे यांची नावे आघाडीवर होती. राज्य सरकारने नांदेड जिल्हा परिषद मुख्य कार्यकारी अधिकारी म्हणून वर्षा ठाकूर यांच्या नियुक्तीचे आदेश काढले आहेत.
औरंगाबाद येथे सामान्य प्रशासन विभागात त्या उपायुक्त म्हणून कार्यरत होत्या. वर्षा ठाकूर या नांदेड जिल्हा परिषदेत पहिल्या महिला मुख्य कार्यकारी अधिकारी ठरल्या आहेत. जिल्हा परिषद अध्यक्षपदी महिला, जिल्हा परिषद उपाध्यक्षपदी महिला आता सीईओ म्हणूनही महिलेची नियुक्ती झाली आहे. त्यामुळे महिलाराज प्रत्यक्षात पहायला मिळणार आहे.
चार अधिकाऱ्यांच्या बदल्या -
वर्षा ठाकूर यांच्यासह राज्यातील 4 सनदी अधिकाऱ्यांच्या बदल्या करण्यात आल्या आहेत. या अधिकाऱ्यांच्या वेगवेगळ्या ठिकाणी नेमणुका करण्यात आल्या आहेत. यात नंदूरबार जिल्हा परिषदेचे मुख्य कार्यकारी अधिकारी विनय गौडा यांची बदली सातारा जिल्हा परिषदेचे मुख्य कार्यकारी अधिकारी म्हणून करण्यात आली आहे. प्रदीप डांगे यांची नेमणूक मुख्य कार्यकारी अधिकारी, जिल्हा परिषद गोंदिया या पदावर करण्यात आली आहे. सिद्धराम साळीमठ यांची नेमणूक मुख्य कार्यकारी अधिकारी, जिल्हा परिषद पालघर या पदावर करण्यात आली आहे.
