नांदेड - आर्थिक देवाण-घेवाणीतून चाकूने भोसकून आपल्या मित्राचा खून केल्याची घटना समोर आली. ही घटना मंगळवारी रात्री नऊच्या सुमारास छत्रपती चौक परिसरात घडली. पोलिसांनी तत्परता दाखवत मारेकऱ्याला अटक केली आहे.
नांदेड शहरातील छत्रपती चौक परिसरात असलेल्या नवजीवन कॉलनीमध्ये राहणारे संदीप सदावर्ते (वय २४) आणि संजय कापूरे (वय ४५) या दोघांमध्ये आर्थिक देण्याघेण्याचा व्यवहार होता. यातून संदीप सदावर्ते यांनी पैसे घेतले होते. त्यापैकी काही पैसे त्याने दिले. परंतु, १० हजार रुपये देण्यास त्याला विलंब लागू लागला. अखेर मंगळवारी रात्री संजय कापूरे याने त्याच्याशी वाद घातला आणि चाकूने भोसकून त्याचा खून केला.
घटनास्थळी भाग्यनगर पोलीस ठाण्याचे पोलीस निरीक्षक अनिरुद्ध काकडे हे आपल्या सहकाऱ्यांसह काही वेळेच्या आत पोहोचले. जखमीला येथील खासगी रुग्णालयात व त्यानंतर शासकीय रुग्णालयात दाखल केले. परंतु, उपचारादरम्यान संदीप सदावर्ते यांचा मृत्यू झाला. तर इकडे मारेकरी संजय कापूरे याला अटक केली. या प्रकरणी भाग्यनगर पोलीस ठाण्यात गुन्हा दाखल करण्यात आला आहे.
