नांदेड - विधानसभेचे विरोधी पक्षनेते आणि काँग्रेसचे नेते राधाकृष्ण विखे पाटील यांनी माहूरगडावरील रेणुका देवीचे दर्शन घेतले. रेणुका माता आमची कुलस्वामिनी असून आपण नेहमीच नवरात्रीच्या पहिल्या माळेला माहूर गडावर दर्शनासाठी येत असतो. यावेळी नवरात्रात येणे न झाल्याने आता दर्शनाला हजेरी लावली असल्याचे पाटील यांनी यावेळी सांगितले, दरम्यान सुयय विखेंच्या भाजप प्रवेश आणि प्रचार बाबत विचारणा केली असता, देवीच्या ठिकाणी राजकीय विषय नको, असे सांगत राधाकृष्ण विखे पाटील यांनी बोलणे टाळले.
विखे-पाटील यांनी मंगळावरी सकाळी १० वाजता माहूरगडावरील रेणुका मातेचे दर्शन घेऊन आरती केली. यावेळी रेणुकादेवी संस्थांनच्या वतीने विश्वस्त चंद्रकांत भोपी, संजय कान्नव, समीर भोपी,अश्विन भोपी, शुभम भोपी,यांनी त्यांचा यथोचित सत्कार केला. यावेळी त्यांच्या समवेत विखे पाटील कृषी परिषदेचे प्रदेशाध्यक्ष भागवत देवसरकर यांची उपस्थिती होती. शेगाव येथील गजानन बाबाचे सकाळी आठ वाजता दर्शन घेऊन ते माहूर गडावर दर्शनासाठी आले होते. दर्शन आटोपल्या नंतर पत्रकारांनी विखे पाटील यांची संवाद साधला. राज्यात दुष्काळाचे सावट असून बळीराजा हवालदिल झाला आहे. दुष्काळ कायमचा हटला पाहिजे, राज्यातील शेतकऱ्यांना दुष्काळातून मुक्ती मिळो, शेतकरी आत्महत्या टळो, असे साकडे रेणुका मातेला घातले असल्याचे विखे म्हणाले.
माध्ममांनी केवळ नगरची निवडणूक टार्गेट केलीय-
राधाकृष्ण विखे-पाटील यांचे चिरंजीव सुजय विखे-पाटील यांनी भाजपमध्ये प्रवेश केला आहे. भाजपनेही त्यांना अहमदनगर मधून लोकसभेचं तिकीट दिले आहे. या विषयी विचारणा केली असता, देवीच्या ठिकाणी राजकीय बोलणे योग्य नाही, असे म्हणत त्यांनी डॉ. सुजय विषयी बोलणे टाळले.देशा सह राज्यात लोकसभेची निवडणूक सुरू असतना मीडियाने केवळ नगरची निवडणूक टार्गेट केली आहे. मी या पूर्वी ही सांगितले आहे की,पक्ष देईल ती जबाबदारी मी पार पाडेन व माझी भूमिका पुढच्या आठवड्यात मुंबई येथे प्रेस कॉन्फरन्स घेऊन स्पष्ट करणार असल्याचे त्यांनी यावेळी स्पष्ट केले.
वर्षातून किमान एक-दोन वेळा तरी माहूर दर्शनासाठी येणारे राधाकृष्ण विखे पाटील माध्यम प्रतिनिधींसह स्थानिक पुजाऱ्यांचे व कार्यकर्त्यांचे चांगल्याच परिचयाचे आहे. आज मात्र ते नेहमीच्या शैलीत दिसून आले नाहीत, त्यांच्या चेहऱ्यावर नैराश्य जाणवत होते. अवघ्या एका तासातच त्यांनी आपला दौरा आटपून हेलिकॉप्टरने औरंगाबादकडे प्रयाण केले. या वेळी त्यांच्या समवेत भागवत देवसरकर, विनीत पाटील, शिवशंकर थोटे, संदीप पावडे, स्वप्नील जाधव, ऋषी क्षीरसागर, ज्ञानेश्वर चौधरी, निखिल शिंदे पाटील, यांची उपस्थित होती.
