नांदेड - राज्यातील ९८ तहसीलदारांना उपजिल्हाधिकारी पदाच्या पदोन्नतीची भेट स्वातंत्र्यदिनाच्या पुर्वसंध्येला मिळाली आहे. शासनाच्या महसूल व वनविभागाने हे आदेश काढले. नांदेडात पुर्वी काम केलेले अरविंद नरसीकर, प्रविण मेंगशेट्टी, महेश सुधळकर या अधिकाऱ्यांचा यात समावेश आहे.
मागील ६ महिन्यांपासून तहसीलदारांच्या पदोन्नत्या रखडल्या होत्या. लोकसभा निवडणुकीच्या आचारसंहितेमुळे ही प्रक्रिया लांबली. विधानसभा निवडणुकीच्या अगोदर पदोन्नतीची कार्यवाही पूर्ण करण्यासाठी इच्छुक तहसीलदारांनी शासनाला साकडे घातले होते. त्यांची मागणी आता पूर्ण झाली आहे. येत्या काही दिवसात उपजिल्हाधिकारी पदांच्या रिक्त जागेवर या तहसीलदारांना उपजिल्हाधिकारी म्हणून नियुक्ती दिली जाणार आहे.
विभागीय आयुक्त कार्यालयात पूर्वी कार्यरत असलेल्या ऐश्वर्या काळुशे, नांदेडमध्ये काम केलेले एस. ए. झाडके, चाकूरचे तहसीलदार असलेले अरविंद नरसीकर, औरंगाबाद जिल्ह्यात कार्यरत असलेले प्रविण मेंगशेट्टी, महेश सुदळकर, श्याम मदनुरकर यांचा पदोन्नत उपजिल्हाधिकाऱ्यांमध्ये समावेश आहे.
