भररस्त्यात महिलेचा विनयभंग; नांदेडमधील धक्कादायक प्रकार

शहरातील रस्त्यावर एका महिलेचा विनयभंग केल्याची घटना २५ ऑगस्टला घडली आहे. फिर्यादी महिलेची बहीण आजारी असल्याने तिला शहरातील लालवाडी भागातून एका खासगी रुग्णालयात आणत असताना हा प्रकार घडला आहे.

नांदेड - शहरातील एका रस्त्यावर महिलेचा विनयभंग केल्याची घटना २५ ऑगस्टला रात्री ८.३० च्या दरम्यान घडली. महिलेचा हात धरुन तिला कवेत घेण्याचा प्रयत्न केल्याची तक्रार एका महिलेने शिवाजीनगर पोलीस ठाण्यात नोंदवली आहे.

फिर्यादी महिलेची बहीण आजारी असल्याने तिला शहरातील लालवाडी भागातून एका खासगी रुग्णालयात आणत असताना हा प्रकार घडला आहे. सैयद नसीर सैयद छोटु मिया (रा.सुगाव) या व्यक्तीने मागील बाजूने महिलेचा हात धरण्याचा प्रयत्न केला. या प्रकरणी महिलेने दिलेल्या तक्रारीवरून सय्यद नसीर यांच्या विरुद्ध शिवाजीनगर पोलीस ठाण्यात गु.र.नं. ३१२/१९ अन्वये गुन्हा नोंद करण्यात आला असून, पोलीस उपनिरीक्षक होळकर पुढील तपास करत आहेत.