नांदेड - नायगाव तालुक्यात अल्पवयीन मेहुणीवर अत्याचार केल्याची घटना घडली आहे. या प्रकरणी कुकर्म करणाऱ्या भावोजीला पोलिसांनी बेड्या ठोकल्या आहेत. मेहुणीला खोटे कारण सांगत महाविद्यालयातून नेऊन आरोपीने अत्याचार केले. या प्रकरणी आरोपीला २ दिवसांची पोलीस कोठडी देण्यात आली आहे.
पोलिसांनी दिलेल्या माहितीनुसार, नायगाव तालुक्यातील राहेर येथील मूळ रहिवासी असलेला आरोपी सध्या तेलंगणातील बोधन येथे सुतार काम करतो. पीडित अल्पवयीन मुलीच्या बहिणीसोबत त्याचा विवाह झाला आहे. तर आरोपीची मेहुणी नायगावमध्ये तिच्या चुलत्यांकडे राहण्यास असून ती कनिष्ठ महाविद्यालात शिक्षण घेत आहे. ५ जुलैच्या सकाळी ११ च्या दरम्यान आरोपी दुचाकी घेऊन कॉलेजमध्ये मेहुणीकडे गेला. तुझे चुलते गावाला गेले असून तुला आणण्यास मला पाठवले आहे, असे खोटे कारण सांगितले.
भावोजीच असल्याने तरुणी दुचाकीवर बसून सोबत गेली. मात्र, आरोपीने तिला घरी न नेता तेलंगणातील सारंगपूर येथे व तेथून सायंकाळी त्याच्या बोधन येथील घरी नेले. तिथे पोहोचल्यावर तरुणीच्या बहिणीला जीवे मारण्याची धमकी देत तिच्यावर अत्याचार केला. त्यानंतर ६ जूनला तरुणीला घरी सोडले.
अत्याचार करणारा आरोपी भावोजीच असल्याने तरुणीचे कुटुंबीय हादरले. मात्र, पीडितेच्या बहिणीने अत्याचारी पतीला शिक्षा झालीच पाहिजे, अशी भूमिका घेऊन कुटुंबाला धीर दिला. ९ जुलै रोजी पीडितेने नायगाव पोलीस ठाण्यात तक्रार दिली. या तक्रारीवरुन पोस्को कायद्यानुसार गुन्हा दाखल करण्यात आला आहे. पोलिसांनी तत्परतेने आरोपीला अटक केली आहे. सहाय्यक पोलीस निरीक्षक जी. जी. पाटेकर पुढील तपास करत आहेत.
