नांदेड - लोकसभा निवडणुकांचे बिगुल रविवारी वाजले. निवडणुकांच्या तारखा जाहीर होताच आचारसंहितादेखील लागू झाली आहे. नांदेड, लातूर आणि हिंगोली लोकसभा मतदारसंघांसाठी १८ एप्रीलला मतदानाची प्रक्रिया पार पडणार आहे. या तीनही जिल्ह्यात एकूण २५ लाख मतदार या वेळी आपला मतदानाचा हक्क बजावणार आहेत.
नांदेड लोकसभा मतदारसंघात ६ विधानसभा मतदारसंघ, हिंगोली लोकसभा मतदारसंघात २ विधानसभा मतदार संघ तर लातूर लोकसभा मतदारसंघात एक विधानसभा मतदारसंघ येतो. या तीनही मतदारसंघातील २५ लाख २ हजार २४४ मतदार आणि त्यांच्यासाठी २९५५ मतदान केंद्रे सज्ज ठेवण्यात आली आहेत. या तिनही ठिकाणी १८ एप्रिलला मतदान होणार आहे. रविवारी जाहीर झालेल्या लोकसभा निवडणुकांसाठी गेल्या महिनाभरापासून सर्व तयारी सुरु करण्यात आली असून, वेगवेगळ्या मतदान केंद्रासंदर्भात व एकूण मतदार संख्येसंदर्भात पडताळणी पुर्ण करण्यात आली आहे.
आजमितीला नांदेड जिल्ह्यात नांदेड, हिंगोली आणि लातूर या ३ लोकसभा मतदारसंघांसाठी २ लाख ५० हजार २४४ मतदार नोंदविण्यात आले आहेत. नव्याने आलेली नोंदणी आणि वगळणी हा आकडा साधारण ५ हजारांपर्यंत वाढण्याची शक्यता असून, अंतिम आकडेवारी येत्या २ ते ३ दिवसात पूर्णपणे जाहीर करण्यात येणार आहे.
नांदेड जिल्ह्यात भोकर, नांदेड दक्षिण, नांदेड उत्तर, नायगाव, देगलूर, मुखेड या ६ विधानसभा मतदारसंघांचा लोकसभा मतदारसंघात समावेश होतो. त्याचबरोबर हिंगोली लोकसभा मतदारसंघात किनवट आणि हदगाव हे २ विधानसभा मतदारसंघ येतात तर, नांदेड जिल्ह्यातील लोहा मतदारसंघ हा लातूर लोकसभा मतदारसंघांचा समावेश होतो. नांदेड लोकसभेची सर्व तयारी पूर्ण झाली असून, हिंगोली आणि लातूर लोकसभा मतदारसंघांसाठी नांदेड जिल्ह्यातूनच प्रशासकीय यंत्रणा राबविण्यात येणार आहे. अशी माहिती जिल्हाधिकारी अरूण डोंगरे यांनी दिली आहे.
