नांदेड - प्रेमाच्या जाळ्यात ओढून प्रियकराने वारंवार अत्याचार केल्यानंतर लग्नाला नकार दिला. त्यामुळे हताश झालेल्या प्रेयसीने झोपेच्या गोळ्या खाऊन आत्महत्येचा प्रयत्न केला. ही घटना नांदेड शहरातील श्रीनगर परिसरात मंगळवारी घडली. दरम्यान आरोपी प्रियकराविरुद्ध गुन्हा दाखल करण्यात आला असून पोलीस त्याचा शोध घेत आहेत.
हदगाव तालुक्यातील २५ वर्षीय तरुणी नांदेडला श्रीनगर परिसरात शिकण्यासाठी राहते. सन २०१४ पासून शहरातील राजनगरमधील सुनील बापूराव लांडगे (वय ३२ )या तरुणाने तिला प्रेमाच्या जाळ्यात ओढले. तू मला फार आवडतेस, मी तुझ्याशी लग्न करेल, असे म्हणून त्याने पीडितेवर तिच्या खोलीत, मैत्रिणीच्या खोलीत वारंवार अत्याचार केल्याचा आरोप पीडितेने केला. नंतर त्याने तिच्यासोबत लग्न न करता दुसरीसोबत लग्न ठरवून फसवणूक केल्याचे पीडितेचे म्हणणे आहे. तसेच त्याने फोनवर तिचा मानसिक व शारीरिक छळ केल्याने तिने झोपेच्या गोळ्या खाऊन आत्महत्येचा प्रयत्न केल्याचे पीडित तरुणीने पोलिसांना सांगितेले.
त्यानंतर तिला उपचारासाठी रुग्णालयात दाखल करण्यात आले आहे. पीडितेचा जवाब नोंदवल्यानंतर भाग्यनगर पोलिसांनी सुनीलविरुद्ध गुन्हा दाखल केला आहे.
या प्रकरणाचा सहाय्यक पोलीस निरीक्षक आर. के. डमाळे तपास करत आहेत. आरोपी फरार झाला असून त्यास लवकरच अटक करण्यात येणार असल्याचे पोलीस सूत्रांनी सांगितले आहे.
