नांदेड - लोकसभा निवडणुकीच्या प्रचारादरम्यान भाजपच्या एका कार्यकर्त्याने राष्ट्रवादीच्या पदाधिकाऱ्याच्या कुटुंबावर खालच्या पातळीवर केलेल्या वक्तव्यावरून दोन गटात हाणामारी झाली आहे. हाणामारीत तीन जण जखमी झाले असून, एक जण गंभीर जखमी झाला आहे. त्याला प्रथम यवतमाळ व नंतर सावंगी मेघे येथील मेघे हॉस्पिटलमध्ये अधिक उपचारासाठी हलविण्यात आले आहे.
माहूर शहरात शुक्रवारी सकाळी ११ वाजण्याच्या सुमारास वार्ड क्रमांक १३ मधील मारुती मंदिराजवळ मारहाणीची घटना घडली होती. त्यानंतर दुपारी एक ते दोनच्या दरम्यान शिवसेनेचे तालुका प्रमुख सुदर्शन जोगाराम राठोड (नाईक), सोनू उर्फ आशिष चारभाई, पवन शर्मा, शक्ती ठाकूर अविनाश मोहन राठोड अक्षय परस्कर संदीप हुसे, व इतर २० ते २५ लोकांच्या जमावाने सर्फराज दोसानी यांच्या मालकीच्या न्यू माहेर कलेक्शन या कापड दुकानात हातात घण लाठ्या, काठ्या, लोखंडी रॉड, घेऊन घुसून दुकातील माल लुटण्याचा प्रयत्न केला. त्याचबरोबर दुकानाच्या गल्ल्यातील रोख रक्कम लुटून नेली. यात दोन ते अडीच लाख रुपये होते, असा आरोप दोसानी यांनी केला आहे.
मागील सहा महिन्यांपूर्वीच दोसानी यांचे फायबर फर्निचरचे दुकान जाळून ७० ते ७५ लाख रुपयांचे नुकसान करण्यात आले होते. याच लोकांनी आमचे दुकान जाळले असावी, असा संशय पोलिसात दिलेल्या तक्रारीत फिर्यादी सर्फराज दोसानी यांनी व्यक्त केला आहे. मोठे बंधू फिरोज दोसानी हे नगराध्यक्ष असल्याने आमच्या परिवारावर सातत्याने असे हल्ले होत असून, आमच्या परिवाराचा आर्थिक व शारीरिक नुकसानीचा हेतू असल्याचे तक्रारीत नमूद करण्यात आले आहे.
दरम्यान जखमींवर माहूरच्या ग्रामीण रुग्णालयात डॉ. विजय मोरे, डॉ.निरंजन केशवे यांनी प्रथमोपचार करून यवतमाळला पुढील उपचारासाठी पाठवले. या हाणामारीत एमआयएमच्या नगरसेविकाचा मुलगा शेख सज्जाद शेख अजीज हा गंभीर जखमी झाला आहे. त्याला यवतमाळ येथील शासकीय रुग्णालयातून सावंगी मेघे येथे हलविण्यात आले. या घटनेने माहूर शहरात दिवसभर तणाव निर्माण झाला होता.
