नांदेड - गेल्या दहा दिवसापासून अर्धापूर तालुक्यातील उमरी येथील रहिवाशी देविदास बारसे (वय-४०) हे बेपत्ता होते. दरम्यान, शहराच्या डंकीन परिसरात गोदावरी नदी किनारी बुधवारी सांयकाळी साडेपाचच्या सुमारास पोत्यात बांधलेल्या अवस्थेत बारसे यांचा मृतदेह सापडला आहे. या प्रकरणी वजीराबाद ठाण्यात अज्ञात मारेकऱ्यांविरुद्ध खुनाचा गुन्हा दाखल करण्यात आला आहे.
देविदास दत्तरामजी बारसे हे २१ जानेवारीला एका नातेवाईकाला घेऊन नांदेडमधील रुग्णालयात आले होते. त्यानंतर नातेवाईकास रुग्णालयात दाखल करून गावाकडे जातो म्हणून दवाखान्यातून निघाले. मात्र, देविदास बारसे घरी पोहोचलेच नाहीत. त्यामुळे नातेवाईकांनी त्यांची शोधाशोध केली. पण त्यांचा कोठेच थांगपत्ता लागला नसल्याने बेपत्ता झाल्याची तक्रार अर्धापूर पोलीस ठाण्यात दाखल करण्यात आली होती.
पोलीस तपास सुरू असतानाच बुधवारी गोदावरी नदीकिनारी डंकीन भागात पोत्यात बांधलेला एक मृतदेह आढळला. यावेळी पोलीस उपअधीक्षक धनंजय पाटील, पोलीस निरीक्षक संदीप शिवले यांनी घटनास्थळी जाऊन पाहणी केली. त्यानंतर मृतदेहाची ओळख पटविण्यासाठी त्याचा फोटो सोशल मीडियावर टाकला. मृतदेहाचा फोटो पाहून बारसे यांच्या नातेवाईकांनी पोलिसांशी संपर्क साधला. त्यानंतर ३१ जानेवारीला बारसे यांच्या पार्थिवाचे शवविच्छेदन करण्यात आले. त्यामध्ये त्यांचा खून झाल्याचे स्पष्ट झाले आहे. पोलीस आता खुनाचे नेमके कारण व आरोपींचा शोध घेत आहेत.