मुंबई - निवडणूक आयोगाकडून महाराष्ट्र विधानसभा निवडणुकीची घोषणा कधीही होऊ शकते. या अनुषंगाने महायुतीची संयुक्त पत्रकार परिषद मुंबईत आयोजित करण्यात आली होती. याप्रसंगी महायुतीच्या नेत्यांकडून महाविकास आघाडी आणि उद्धव बाळासाहेब ठाकरे गटाचे प्रमुख उद्धव ठाकरे यांच्यावर टीका करण्यात आलीय. महायुतीच्या संयुक्त पत्रकार परिषदेनंतर महाविकास आघाडीची संयुक्त पत्रकार परिषद आता 11 ऑक्टोबरला मुंबईत होणार आहे.
महायुतीमध्ये पूर्णतः समन्वय : हरियाणा आणि जम्मू-काश्मीरच्या निकालानंतर महाराष्ट्रातील विधानसभा निवडणुकीची घोषणा केंद्रीय निवडणूक आयोगाकडून कुठल्याही क्षणी केली जाऊ शकते. याच अनुषंगाने हरियाणातील विजयाने भाजपाचं आणि राज्यात महायुतीचं मनोबल उंचावलं असल्याकारणाने विधानसभा निवडणुकीसाठी महायुती पूर्णपणे सज्ज झाली असून, याबाबत सविस्तर माहिती देण्यासाठी महायुतीकडून मुंबईत संयुक्त पत्रकार परिषदेचे आयोजन करण्यात आलं होतं. याप्रसंगी बोलताना शिवसेनेचे शिंदे गटाचे नेते आणि मंत्री शंभूराजे देसाई म्हणाले की, निवडणुका कधीही घोषित होऊ शकतात. याबाबत महायुतीच्या अनेक बैठका झाल्या. आम्ही 288 मतदारसंघांत निवडणूक समन्वयकांच्या नियुक्त्या केल्यात. महायुतीत पूर्णतः समन्वय आहे. जागा कुणाला किती याबाबत काही मतभेद नाहीत. प्रत्येक पक्षातील प्रमुख नेते याबाबत निर्णय घेतील. त्याची अंमलबजावणी करणे ही जबाबदारी प्रत्येक पक्षाने आमदार, खासदार आणि समन्वयक यांना देण्यात आली आहे. आम्ही पूर्ण ताकतीने मैदानात उतरणार आहोत. उमेदवारी जाहीर झाल्यावर बंडखोरी होणार नाही, याकडे बारकाईने लक्ष ठेवू. तसा प्लान आमच्याकडे तयार आहे. लोकसभेत फेक नरेटिव्हचा फटका आम्हाला बसला. पण आता तसे होणार नाही. जे विकासाचे काम मागच्या अडीच वर्षांत महायुतीने केलंय, त्या कामाच्या जोरावर आम्ही लोकांमध्ये जाणार आहोत. आम्ही टीकेकडे लक्ष देत नाहीत, तर कामाच्या कृतीमध्ये विश्वास ठेवतो. महायुती बहुमताच्या आकड्याच्या खूप पुढे जाईल, असंही शंभूराज देसाई म्हणालेत.
महाविकास आघाडीचा मुख्यमंत्री ठरवा: उबाठा गटाचे प्रमुख, माजी मुख्यमंत्री उद्धव ठाकरे यांनी पुन्हा एकदा महाविकास आघाडीमध्ये मुख्यमंत्रिपदाचा चेहरा ठरवण्यावरून वक्तव्य केलंय. याचा समाचार घेताना शंभूराज देसाई म्हणाले की, महायुतीला उबाठा गटाचे नेते वारंवार सांगत आहेत की, मुख्यमंत्रिपदाचा चेहरा घोषित करा. तशी घाई आमच्याकडे नाही. आम्ही एकत्र निवडणूक लढू, बहुमताने निवडून येऊ आणि त्यानंतर मुख्यमंत्रिपदाचा चेहरा घोषित करू. ज्याला महाविकास आघाडीच्या यशापेक्षा मुख्यमंत्रिपदाची खुर्चीच फक्त समोर दिसत आहे, अशा लोकांनीत आता घाई केली आहे. मुख्यमंत्रिपदाकरिता उद्धव ठाकरे यांनी दिल्लीवारी केली, पण त्यांना यश आले नाही. हिंदूहृदयसम्राट बाळासाहेब ठाकरे कधी कुठल्या पदासाठी झुकले नाहीत, असा टोलाही शंभूराज देसाई यांनी उद्धव ठाकरेंना लगावलाय.
मुख्यमंत्रिपदाचे दार उघड?: निवडणुकीच्या तोंडावर महायुतीत होणाऱ्या बंडखोरीबद्दल बोलताना महायुतीचे समन्वयक, आमदार प्रसाद लाड म्हणाले की, प्रत्येक कार्यकर्ता, नेता याला तिकीट मागण्याचा अधिकार आहे. पाच वर्षे केलेल्या कामाच्या जोरावर तो तिकीट मागत असतो. पण याबाबत अंतिम निर्णय वरिष्ठ नेते घेतील. परंतु आमच्यात बंडखोरी होणार नाही. सध्याच्या घडीला जे बाहेर पडत आहेत, त्यांना इतर पक्षातून निवडणुकीचं तिकीट दिलं जात आहे. त्या पद्धतीचं आमिष दाखवलं जातंय. पण याच्या दुप्पट वेगाने येणाऱ्या दिवसात महायुतीत इनकमिंग होणार असल्याचंही लाड म्हणाले. शिवसेना उबाठा गटाकडून दसऱ्याच्या मुहूर्तावर "दार उघड, बये दार उघड" अशा पद्धतीचा टीझर प्रकाशित करण्यात आला आहे. याचाही समाचार प्रसाद लाड यांनी घेतला असून, "दार उघड बये दार उघड" हे फक्त उद्धव ठाकरे त्यांच्या मुख्यमंत्रीपदाच्या दारा विषयी बोलत आहेत, असा टोला लाड यांनी लगावलाय.
हेही वाचा
