नांदेड - तीन लाख रुपयांच्या बदल्यात 10 लाखांच्या नोटा देण्याचे आमिष दाखवून तीन भामट्यांनी गंडा घातल्याचे समोर आले आहे. तेलंगणामधील निजामाबाद जिल्ह्यातील तिघांनी मुखेड तालुक्यातील उमरदरीतील व्यक्तीची फसवणूक केली आहे.
उमरदरी येथील शिवलिंग गोगे नामक व्यक्तीला मागील पंधरा दिवसांपासून अनोळखी व्यक्तीचे फोन येत होते. संबंधित व्यक्तीने आपण निजामाबादचे रहिवासी असून मोहम्मद एजाज नाव असल्याचे सांगितले. तसेच आपल्याकडे 500 रुपयांच्या खऱ्या नोटा असून आपले आरबीआयशी नेटवर्क असल्याने रेकॉर्डवर नसलेल्या नोटा असतात, असे भासवले. आपण तीन लाखांच्या बदल्यात 10 लाख रुपये देण्याचे आमिष दाखवून 9 जानेवारीला सकाळी 3 लाख रुपयांसह बोधन बसस्थानकावर बोलवले.
हेही वाचा - अमेरिकन डॉलरची चोरी करणाऱ्या आरोपीला हैदराबादमधून अटक
ठरल्याप्रमाणे शिवलिंग गोगे यांनी बोधनला गेल्यावर या व्यक्तीला फोन केला. बिलोली बसस्थानकासमोर येण्याचा निरोप दिल्यावर दुपारी एक वाजण्याच्या सुमारास दोन वेगवेगळ्या मोटारसायकलवरून तिघेजण आले. त्यापैकी एकाने आपण मोहम्मद एजाज असल्याचे सांगितले. यानंतर त्याने पैशांबद्दल विचारणा केली. शिवलिंग यांनी सोबत नेलेले तीन लाख रुपये दाखवले. यानंतर एजाजने सोबत असलेल्या व्यक्तींना दहा लाख देण्याचे सांगून स्वत: तीन लाखांची रक्कम घेऊन पळ काढला. त्याच्या दोन साथीदारांनी बाजूला नेऊन त्यांच्याजवळील 500 रुपयांच्या नोटांचे 20 बंडल दिले. शिवलिंग यांनी ते पाहिल्यानंतर सुरुवातीच्या बंडलमध्ये 3 खऱ्या नोटा व शेवटच्या बंडलमध्ये एक खरी नोट होती. उरलेल्या चिल्ड्रन्स बँकेच्या बनावट नोटा असल्याचे लक्षात आले.
हेही वाचा - चोरीच्या घटनांमध्ये वाढ; आठवड्यात दोन एटीएम मशीन चोरीला
आपली फसवणूक झाल्याचे कळल्यानंतर शिवलिंग गोगे यांनी पोलिसांशी संपर्क साधला. गोगे यांनी पोलिसांना घडलेला प्रकार कथन केला. चौकशीदरम्यान स्थानिक गुन्हे शाखेचे साहाय्यक पोलीस निरीक्षक भारती व त्यांचे पथक या ठिकाणी पोहोचले. पोलिसांनी त्या दोघांनाही ग्लॅमर दुचाकीसह पकडले.
हेही वाचा - भरदिवसा घरफोडी; मुलीच्या उच्च शिक्षणासाठी ठेवलेल्या 22 लाख ६५ हजारांच्या रोकडसह ऐवज लंपास
शेख खैसर शेख हैदर(वय- 27) आणि शेख नदीम शेख मन्नाम (वय - 27) या दोन आरोपींना बेड्या ठोकल्या आहेत. हे दोघेही निजामाबाद, तेलंगणाचे रहिवासी आहेत. तसेच त्यांचा साथीदार साथीदार मोहम्मद एजाज हा निजामाबादच्या ड्रायव्हर्स कॉलनीतील रहिवासी आहे. पोलीस पुढील तपास करत आहेत.
