नागपूर - आज वटपौर्णिमा सर्वत्र उत्साहात साजरी केली जात आहे. शहरात महाराष्ट्र नवनिर्माण सेनेच्या महिला आघाडीतर्फे वटसावित्री पूजेच्या माध्यमातून वृक्ष संवर्धनाचा संदेश देण्यात आला. यासाठी अजनी येथील वनात झाड कापण्याची नोटीस चिटकवलेल्या वट वृक्षाची महिलांनी पूजा करून झाडे कापण्याच्या शासन निर्णयाचा निषेध केला.
वटपौर्णिमेचा व्रत सगळीकडे उत्साहात साजरा करण्यात येत आहे. या व्रता दरम्यान पतीला दीर्घायुष्य मिळावे म्हणून स्त्रिया वडाच्या झाडाची पूजा करतात. एकीकडे वडाच्या झाडाची हिंदू रितीनुसार पूजा करताना झाडांचे संवर्धन व संरक्षण देखील तेवढेच महत्वाचे आहे. हेच उद्दिष्ट समोर ठेऊन महाराष्ट्र नवनिर्माण सेनेच्या महिला आघाडीतर्फे आज अजनी मधील वडाच्या झाडाची पूजा करण्यात आली.
इंटर मॉडेल स्टेशनच्या निर्मितीसाठी अजनी वनाची होणार कटाई -
इंटर मॉडल स्टेशनच्या निर्मितीसाठी अजनी परिसरातील झाडांना कापण्यात येणार आहे. यासाठी अनेक जुन्या व मोठ्या झाडांची कटाई होणार आहे. प्रशासनातर्फे ज्या झाडांना कापण्यात येणार आहे त्या झाडांवर नोटीस चिकटवण्यात आली आहे. अशाच अनेक दशके जुन्या असलेल्या वडाच्या झाडावर देखील महापालिकेने झाड कापण्याची नोटीस चिकटवली आहे. वट पौर्णिमेच्या निमित्ताने महिलांनी या वडाच्या झाडाचे पूजन केले. सोबतच अनेक दशके जुनी झाडे नव्या प्रकल्पासाठी कापू नये, असे आवाहनही यावेळी करण्यात आले.
