नागपुरात गतिमंद विवाहितेवर बलात्कार; दोघांना अटक

गतिमंद विवाहितेचे अपहरण करुन तिच्यावर बलात्कार केल्याची संतापजनक घटना घडली आहे.पीडिता 20 ऑगस्टच्या संध्याकाळ पासून घरुन बेपत्ता होती. पोलिसांनी या प्रकरणी आरोपी ऑटो चालक आणि मदत करणारा त्याचा मित्र या दोघांना अटक केली.

नागपूर- शहरात एकाच रात्री तिघांची हत्या झाल्यानंतर आता गतिमंद असलेल्या विवाहितेचे अपहरण करुन तिच्यावर बलात्कार केल्याची संतापजनक घटना घडली आहे. या प्रकरणी धंतोली पोलिसांनी गुन्हा नोंद करुन दोन आरोपींना अटक केली आहे. यातील मुख्य आरोपीचे नाव शहजाद शेख तर दुसरा आरोपी मोहम्मद जावेद अन्सारी आहे.

पोलिसांनी दिलेल्या माहितीनुसार पीडित महिला ही काही प्रमाणात गतिमंद आहे. पीडिता 20 ऑगस्टच्या संध्याकाळ पासून बेपत्ता होती. गुरुवारी संध्याकाळी ती घरी परतली तेव्हा तिच्यावर एका ऑटो चालकाने बलात्कार केल्याचे पीडितेने सांगताच कुटुंबीयांनी धंतोली पोलीस स्टेशन गाठून या संदर्भात तक्रार दाखल केली.

पीडिताने दिलेल्या तक्रारी नुसार पीडिता 20 ऑगस्टच्या संध्याकाळी छत्रपती चौकातून जात असताना नरेंद्र नगरकडे जाण्यासाठी ती आरोपी ऑटो चालकाच्या रिक्षात बसली. मात्र, आरोपी रिक्षाचालक व मुख्य आरोपीचे शहजाद शेख याने तिला निश्चित ठिकाणी न सोडता बळजबरीने उप्पलवाडी परिसरात नेले. आरोपीने उप्पलवाडीमध्ये तिला दोन दिवस मित्राच्या घरी डांबून ठेऊन तिच्यावर सामूहिक बलात्कार केला. त्यानंतर गुरुवारी संध्याकाळी तिला इतवारी रेल्वे स्टेशनवर सोडून आरोपी पळून गेले.

पीडित महिला घरी परतल्यानंतर तिने कुटुंबीयांना सर्व प्रकार सांगितला. पोलिसांनी या प्रकरणी आरोपी ऑटो चालक आणि मदत करणारा त्याचा मित्र या दोघांना अटक केली आहे.