नागपूर - महाविकास आघाडीचे सरकार सत्तेत आल्यानंतर राज्यातील स्थानिक स्वराज्य संस्थेच्या निवडणुकीतही भाजपला मोठा फटका बसताना दिसत आहे. त्याच प्रमाणे नागपूर जिल्हा परिषद आणि पंचायत समतीची ही निवडणूक पार पडणार आहे. यामध्ये नागपूर जिल्हा परिषदेच्या ५८ आणि पंचायत समितीच्या ११६ जागांसाठी मंगळवारी मतदान होईल. त्या पार्श्वभूमीवर राष्ट्रवादीचे नवनिर्वाचित गृहमंत्री अनिल देशमुख आणि विरोधी पक्ष नेते देवेंद्र फडणवीस यांच्यासाठी ही प्रतिष्ठेची लढत ठरणार आहे.
विधानसभा निवडणुकीत जिल्ह्यात पराभवाला सामोरे जावे लागलेल्या भारतीय जनता पक्षाला आता जिल्हा परिषदेत पुन्हा सत्तेत येणे महत्वाचे ठरणार आहे. तर दुसरीकडे विधानसभा निवडणुकीत मिळालेल्या यशामुळे काँग्रेस-राष्ट्रवादीची आघाडी जिल्हा परिषदेत देखील सत्ता पालट करणार का हे पाहणे औत्सुक्याचे ठरणार आहे.
जिल्ह्याच्या ग्रामीण राजकारणावरील काँग्रेस-राष्ट्रवादीची पारंपरिक पकड मोडीत काढत भाजपने १२ वर्षांपूर्वी जिल्हा परिषदेवर सेनेच्या मदतीने भगवा फडकावला होता. पण विधानसभा निवडणुकीत विदर्भातील लोकांनी भाजपला नाकारले. सहापैकी फक्त दोन जागा भाजपच्या हाती लागल्या आहेत. त्यातच महाविकास आघाडीने राज्यात सत्ता स्थापन करून भाजपला सत्तेपासून दूर ठेवले आहे. त्यामुळे सत्तेत सहभागी नसल्याने भाजपच्या कार्यकर्त्यांमध्येही निराशा पाहायला मिळत आहे.
बावनकुळे यांना विधानसभेत उमेदवारी नाकारल्याने निर्माण झालेली नाराजी अद्यापही कायम आहे. कामठीचे आमदार टेकचंद सावरकर हे पूर्वी जिल्हा परिषद सदस्य होते. त्यांच्या पत्नी निशा सावरकर या जिल्हा परिषदेच्या अध्यक्ष होत्या. आता महाविकास आघाडीच्या जोरावर काँग्रेस राष्ट्रवादी जिल्हा परिषदेवर सत्ता मिळवण्यासाठी पराकाष्टा करत आहे. त्यामुळे भाजपसाठी ही निवडणूक अटीतटीची आणि तितकीच प्रतिष्ठेची झालेली आहे.
प्रतिष्ठेच्या झालेल्या या निवडणुकीच्या प्रचारासाठी देवेंद्र फडणवीसांसोबतच केंद्रीय मंत्री नितीन गडकरी देखील मैदानात उतरले आहेत. सावनेर आणि काटोलच्या ग्रामीण भागात आघाडीची चांगली पकड आहे. तसेच काटोलचे आमदार देखील आता गृहमंत्री असल्याने महाविकास आघाडीसाठी जमेची बाजू ठरत आहे.
