नागपूर - चंद्रपूरचे अपक्ष आमदार किशोर जोरगेवार यांनी भाजपला पाठिंबा दिल्यानंतर अनेकांच्या भुवया उंचावल्या होत्या. त्यानंतर किशोर जोरगेवार यांनी त्यासंदर्भात स्पष्टीकरण दिले आहे. माझे समर्थन मी भाजपला दिले नसून मुख्यमंत्री देवेंद्र फडणवीस यांना दिले असल्याचे त्यांनी स्पष्ट केले आहे. या समर्थनाच्या मोबदल्यात कुठलेही पद मागितले नसून चंद्रपूर शहराचा सर्वांगीण विकासाचे आश्वासन मुख्यमंत्री देवेंद्र फडणवीस यांनी दिल्याने समर्थन दिल्याचे जोरगेवार यांनी सांगितले आहे.
हेही वाचा - मेट्रो ट्रेनचा असाही वापर...प्रवाशी नसलेल्या मेट्रोत 'प्री-वेडिंग फोटोशूट'
राज्यात सत्ता स्थापनेसाठी सुरू असलेल्या वाटाघाटीत अपक्ष आमदारांना प्रचंड महत्व प्राप्त झाले आहे. अपक्ष उमेदवार आपल्या बाजूने यावा यासाठी भाजप आणि शिवसेना जोरदार प्रयत्न करत आहे. राज्यात अपक्ष उमेदवार म्हणून सर्वाधिक मताधिक्याने निवडून आलेले चंद्रपूरचे आमदार किशोर जोरगेवार यांनी भाजपला समर्थनाचे पत्र दिले आहे. भाजपच्या ज्या उमेदवाराच्या विरोधात जोरगेवार यांनी निवडणूक लढवली त्याच भाजपला समर्थन दिल्याने अनेकांच्या भुवया उंचावल्या होत्या. यावर माझे समर्थन भाजपला नसून मुख्यमंत्री देवेंद्र फडणवीस यांना दिले असल्याचे त्यांनी स्पष्टीकरण दिले आहे. मुख्यमंत्री देवेंद्र फडणवीस हे माझे जुने स्नेही असल्याने त्यांनी हक्काने मला समर्थन मागितले, म्हणून मी त्यांना जाहीर समर्थन दिल्याचे जोरगेवार यांनी सांगितले आहे. मुख्यमंत्री देवेंद्र फडणवीस हे चंद्रपूर शहराचे पालकत्व घेणार असल्याचे आश्वासन दिल्याचे जोरगेवार यांनी सांगितले आहे.
