नागपूर - विदर्भात तापमानात वाढ होत असताना उष्माघाताबरोबर आता गॅस्ट्रोनेदेखील डोके वर काढले आहे. उन्हामुळे गॅस्ट्रोच्या रुग्णांची संख्या ४०० वर पोहचली असून संपूर्ण विभागात नागपुरात रुग्णांची संख्या अधीक आहे. महानगरपालिकेच्या आयसोलेशन विभागाबरोबरच शासकीय वैद्यकीय रुग्णालय तसेच इंदिरा गांधी शासकीय वैद्यकीय रुग्णालयात ५० ते ६० टक्के रुग्ण रोज उपचारासाठी येत आहेत.
भीषण पाणी टंचाईमुळे दूषित पाण्याचा वापर वाढल्यास येत्या १-२ महिन्यात रुग्णांच्या संख्येत दुप्पट वाढ होण्याची शक्यता आहे. पाणी टंचाईमुळे पाण्याच्या शुद्धतेकडे विशेष लक्ष दिले जात नाही. उष्णतेपासून संरक्षणासाठी शीतपेय आणि बर्फांच्या गोळ्यांमधून सहज खाल्ला जाणारा बर्फ आरोग्यासाठी धोकादायक ठरत आहे. दूषित पाण्यापासून पसरणाऱ्या आजारांचा फैलाव वाढत आहे. यात गॅस्ट्रोची संख्या जास्ती असल्याचे दिसून येत आहे. त्यामुळे उन्हाळ्यात विशेष काळजी घेण्याचे आवाहन प्रशासनाच्यावतीने करण्यात आले आहे.
