नागपूर- कोरोना प्रादुर्भवामुळे गेल्या सात महिन्यांपासून नागपूरातील शहर बस सेवा बंद होती. ती बस सेवा आता उद्यापासून सुरू करण्याचा निर्णय नागपूर महानगर पालिकेचे आयुक्त राधाकृष्णन बी यांनी घेतला आहे. त्यानुसार उद्यापासून शहरातील ४० प्रमुख मार्गांवर बस सेवा सुरू केली जाणार असल्याची माहिती मनपाचे परिवहन सभापती बाल्या बोरकर यांनी दिली आहे. प्राथमिक टप्प्यात ९० बसेस शहरभर धावणार असून त्यानंतर बसेसची संख्या वाढवण्या संदर्भात निर्णय घेतला जाणार आहे. बस सेवा बंद राहिल्याने गेल्या सात महिन्यात महानगर पालिकेच्या परिवहन विभागाला सुमारे वीस कोटींचा आर्थिक तोटा सहन करावा लागला आहे.
मनपाचे परिवहन सभापती बाल्या बोरकर यांची प्रतिक्रिया कोरोना महामारीमुळे २५ मार्च रोजी देशभरात टाळेबंदी लागू करण्यात आली होती. ज्यामुळे देशातील आंतरराज्य बस सेवेसह शहर बस सेवा देखील बंद करण्यात आली होती. त्यानंतर हळूहळू देशात अनलॉकची प्रक्रिया राबविण्यात आली. ज्यामुळे रेल्वे गाड्यांसाह बसेस देखील पूर्ण क्षमतेने सुरू करण्यात आल्या आहेत. मात्र, नागपूर सारख्या महानगरातील शहर बससेवा सुरू करण्यासंदर्भात निर्णय होऊ शकलेला नव्हता. कोरोना संक्रमणाचा वाढता धोका लक्षात घेता शहर बससेवा सुरू करण्याला हिरवा कंदील देणे शक्य नसल्याचे कारण सांगण्यात आले होते. आता नागपुरात कोरोनाचा धोका कमी झाल्याने महापालिकेचे आयुक्त राधाकृष्णन बी यांनी शहर बस सेवा सुरू करण्याला परवानगी दिली आहे. त्यानुसार उद्यापासून शहरात बस धावणार आहे. पहिल्या टप्प्यात ९० बसेस या ४० मार्गांवर धावणार आहेत. ज्यामध्ये कामठी, काटोल, कोराडी, पारडी, हिंगणा, वाडी आणि बुटीबोरी सारख्या प्रमुख मार्गांचा समावेश आहे. शहर बसने आपल्या कामाच्या ठिकाणी जाणाऱ्यांची संख्या मोठी आहे. त्यामुळे बस सेवा सुरू करण्यासाठी सामान्य नागरिकांकडून सतत्याने मागणी केली जात होती. शिवाय राजकीय पक्ष देखील शहर बससेवा सुरू करण्यासाठी आग्रही होते. आता उद्यापासून बस सेवा सुरू होणार असल्याने याचा फायदा सर्वसामान्य जनेतला होईल.
