मुंबई- मुंबईला पाणीपुरवठा करणाऱ्या तलावांमध्ये पाणीसाठा कमी असल्याने काल (7 ऑगस्ट) २० टक्के पाणी कपात लागू करण्यात आली. मात्र मुंबईत पाणी कपात लागू केलेल्या दिवशीच मुसळधार पाऊस आल्याने महानगरपालिका क्षेत्राला पाणीपुरवठा करणारे दोन तलाव भरले आहेत. यातील विहार तलाव काल रात्री १० च्या सुमारास पूर्ण भरून वाहू लागले, तर तुळशी तलाव देखील भरले आहे.
मुंबईला भातसा, मध्य वैतरणा, तानसा, विहार, मोडक सागर, तुळशी या 7 तलावांमधून पाणीपुरवठा केला जातो. त्यापैकी विहार तलाव हे मुसळधार पावसामुळे पूर्णतह भरले होते. विहार तलाव हा दोन सर्वात लहान तलावांपैकी एक असून यापैकी तुळशी तलाव हा दुसरा सर्वात लहान तलाव आहे. विहार तलावातून दररोज सरासरी ९० दशलक्ष लीटर म्हणजेच, ९ कोटी लीटर एवढ्या पाण्‍याचा पुरवठा केला जातो. गेल्या काही दिवसात या तलावाच्या पाणलोट क्षेत्रात झालेल्या पावसामुळे हा तलाव भरून वाहू लागला आहे, अशी माहिती महानगरपालिकेच्या जल अभियंता खात्याद्वारे देण्यात आली आहे.
२७ हजार ६९८ दशलक्ष लीटर उपयुक्‍त जलधारण क्षमता असणारा हा तलाव गतवर्षी ३१ जुलै, २०१९ रोजी ओसंडून वाहू लागला होता. तर २०१८ मध्ये १६ जुलैला विहार तलाव ओसंडून वाहू लागला होता. बृहन्मुंबई महानगरपालिका मुख्यालयापासून साधारणपणे २८.९६ किलोमीटर अंतरावर विहार तलाव आहे. या तलावाचे बांधकाम सन १८५९ मध्ये पूर्ण झाले. तेव्हा तलावाच्या बांधकामासाठी सुमारे ६५.५ लाख रुपये एवढा खर्च आला होता. या तलावाचे पाणलोट क्षेत्र हे सुमारे १८.९६ किलोमीटर असून तलाव पूर्ण भरलेला असल्यास पाण्याचे क्षेत्रफळ हे सुमारे ७.२६ चौरस किलोमीटर एवढे असते. तलाव पूर्ण भरलेला असताना तलावाचा उपयुक्‍त पाणीसाठा हा २७ हजार ६९८ दशलक्ष लीटर एवढा असतो. हा तलाव पूर्ण भरून वाहू लागल्यानंतर त्याचे पाणी हे मिठी नदीला जाऊन मिळते.
हेही वाचा- राज्यात आज 10 हजार 309 नवे कोरोनाबाधित; 334 मृत्यू
