मुंबई - शहरातील जेजे रुग्णालयात पुरुषाच्या शरीरात महिलेचे गर्भाशय आढळून आले आहे. संबंधित २९ वर्षीय तरुणाचे २ वर्षापूर्वी लग्न झाले होते. त्याला बाळ होत नसल्याने तो तपासणीसाठी आला असता हा प्रकार समोर आला आहे. त्याच्यावर यशस्वी शस्त्रक्रिया करून स्त्री अवयव बाहेर काढण्यात आले.
संबंधीत तरुण जेजे रुग्णालयात तपासणीसाठी आला होता. त्यावेळी डॉ. गीते यांनी त्याची वैद्यकीय तपासणी केली असता त्याचे दोन्ही अंडाशय पोटात होते. त्यानंतर तो स्त्री आहे की पुरुष आहे याची चाचणी करण्यात आली. मात्र, तो लैंगिकरित्या पुरुषच होता. त्यानंतर अंडाशय अंडकोषामध्ये आणण्यासाठी शस्त्रक्रिया करण्याचे ठरवले. मात्र, त्याच्या अंडाकोषाला एक स्त्रीचा अवयव चिकटलेला होता. त्यामुळे एमआरआय करण्यात आले. त्यानंतर तो स्त्रीचाच अवयव म्हणजे गर्भाशय असल्याचे समजले.
अंडाशयापासून निघालेली वीरनलिका त्या गर्भाशयाला चिकटलेली होती. गर्भाशय काढल्याशिवाय अंडाशय अंडकोषामध्ये आणता येत नव्हते. त्यामुळे सुरुवातीला गर्भाशय काढण्यात आले. त्यानंतर अंडाशय अंडकोषामध्ये नेण्यासाठी शस्त्रक्रिया करण्यात आली, असल्याचे डॉक्टर गीते यांनी सांगितले.
जगभरात आतापर्यंत २०० पुरुषांच्या शरीरात गर्भाशय आढळल्याच्या घटना घडल्या आहेत. मात्र, जेजे रुग्णालयात घडलेली ही पहिलीच घटना आहे.
पुरुषांच्या शरीरात का आढळतात स्त्रीचे अवयव - (परसिस्टंट मुलेरिअन डक्ट सिंड्रोम )
अंडकोषामध्ये अंडाशय न राहता ते पोटात राहते. मात्र, ते स्त्रीबीजाच्या जागेवर असते. त्यामुळे स्त्रीचे गर्भाशय आणि स्त्रीच्या शरीरासारखे आणखी अवयव तयार होऊ शकतात. गर्भाशयात ७ आठवड्यापर्यंत असणारे अर्भक स्त्री आणि पुरुष दोन्ही स्वरुपात असते. मात्र, ७ आठवड्यानंतर त्या अर्भकाचे कोणामध्ये रुपांतर होणार आहे. त्यानुसार ते अवयव नष्ट होणे गरजेचे असते. जसे की पुरुषात रुपांतर झाले तर महिलेचे अवयव नष्ट होणे गरजेचे असते. अवयव नष्ट करण्याचे काम अँटीमुलेरीअन हार्मोन करत असते. मात्र, या हार्मोनची कमतरता झाल्यास ते अवयव नष्ट होत नाहीत. पुरुषाच्या अवयवाबरोबर स्त्रीचे अवयव सुद्धा त्या बाळाच्या शरीरात वाढतात. अशा रुग्णांना हर्निया असतो किंवा अंडाशय पोटात असते.
