मुंबई : लोकसभा निवडणूक 2024 मध्ये एकहाती बहुमत मिळविण्यासाठी भाजप पूर्णपणे तयारीला लागला आहे. यासाठी देशभरात भाजप राज्यसभेतील खासदारांना सुद्धा लोकसभेच्या रिंगणात उतरवण्याच्या तयारीत आहे. यामध्ये राज्यसभेतील अनेक नामवंत खासदारांचा समावेश आहे. त्यातच महाराष्ट्रातूनही अनेक जणांचा समावेश असून त्यात केंद्रीय मंत्री नारायण राणे यांचाही समावेश आहे. भाजपकडून नारायण राणे यांना मुंबईतून किंवा रत्नागिरी, सिंधुदुर्ग या लोकसभा मतदार संघातून उमेदवारी देण्याची शक्यता वर्तवली जात आहे.
नारायण राणे यांचे नाव आघाडीवर : लोकसभा निवडणूक 2024 साठी भाजपने कंबर कसली असून त्या दृष्टीने पावले उचलण्यास सुरुवात केली आहे. राज्यात सुद्धा लोकसभेच्या 48 जागांपैकी मिशन 45 जागेसाठी भाजप जोरकस तयारीला लागली आहे. राज्यसभेत भाजपचे ९२ खासदार आहेत. त्यापैकी किमान 25 ते 30 खासदारांनी लोकसभेच्या निवडणूक रिंगणात उतरावे, अशी पंतप्रधान नरेंद्र मोदी यांची इच्छा असल्याची चर्चा आहे. अशात राज्यातील 18 केंद्रीय मंत्र्यांपैकी किमान 10 जणांना लोकसभेच्या निवडणुकीच्या रिंगणात उतरविले जाणार आहे. भाजपच्या अंतर्गत वर्तुळातून जी नावे पुढे येत आहेत त्यामध्ये महाराष्ट्रातून केंद्रीय मंत्री नारायण राणे यांचे नाव आघाडीवर आहे. या विषयावर बोलताना भाजपचे मंत्री, रवींद्र चव्हाण यांनी 2024 च्या लोकसभा निवडणुकीत भाजपला पूर्ण बहुमताने निवडून यायचे आहे. त्याचबरोबर भाजपच्या खासदारांची संख्या ही 405 च्या वर न्यायची असल्याने भाजप पूर्ण तयारीनिशी मैदानात उतरणार आहे. परंतु लोकसभेसाठी उमेदवारी बाबतचा अखेरचा निर्णय हा पार्लरीमेंटरी बोर्डाचा असणार असल्याचेही चव्हाण म्हणाले आहेत.
नारायण राणे यांच्यासाठी मुंबई की रत्नागिरी - सिंधुदुर्ग ? : केंद्रीय मंत्री नारायण राणे हे राज्यसभेत भाजपचे खासदार आहेत. बाळासाहेब ठाकरे यांच्या शिवसेनेत असताना त्यांनी मुख्यमंत्री पद तर काँग्रेसमध्ये असताना त्यांनी राज्याचे महसूलमंत्री पद भूषविले आहे. नारायण राणे यांनी आपला महाराष्ट्र स्वाभिमान हा पक्ष भाजपामध्ये विलीन करुन भाजपमध्ये प्रवेश केला होता. परंतु नंतर राज्यात उद्धव ठाकरे मुख्यमंत्री झाल्यानंतर नारायण राणे यांना केंद्रात मंत्रिपदाची संधी देण्यात आली. नारायण राणे यांनी उद्धव ठाकरे यांच्या विरोधात सतत आक्रमक भूमिका घेतली असून ती भाजपला फायदेशीर ठरु शकते. भाजप नारायण राणे यांच्यासाठी मुंबईतील लोकसभेचा मतदारसंघ शोधण्याच्या तयारीत आहे. रत्नागिरी सिंधुदुर्ग या लोकसभा मतदारसंघातून त्यांना निवडणुकीच्या मैदानात उतरवू शकते, तशा पद्धतीची चाचपणी सुरू आहे.
राणे यांचा राजकीय प्रवास : 20 एप्रिल 1952 रोजी कोकणात जन्मलेल्या नारायण तातू राणे यांनी वयाच्या 20 व्या वर्षी शिवसेनेत प्रवेश केला. कट्टर शिवसैनिक म्हणून त्यांची पक्षात ओळख होती. शिवसेनाप्रमुख बाळासाहेब ठाकरे यांच्या अत्यंत मर्जीतील व निष्ठावंत नेते म्हणून नारायण राणे त्याकाळी ओळखले जायचे. नारायण राणे सुरुवातीला चेंबूरचे शाखाप्रमुख झाले. 1985 मध्ये मुंबई महानगरपालिकेत नारायण राणे बेस्ट समितीचे अध्यक्ष बनले. त्यानंतर नगरसेवक, 'बेस्ट समिती'चे अध्यक्ष आणि त्यानंतर 1990 मध्ये पहिल्यांदा कणकवली-मालवण विधानसभा मतदारसंघातून ते आमदार बनले. छगन भुजबळांनी 1991 आली सेना सोडली आणि नारायण राणे यांच्याकडे विधिमंडळातल्या विरोधीपक्ष नेतेपदाची संधी चालून आली. त्यानंतर शिवसेना-भाजप युती सरकारमध्ये नारायण राणेंनी महसूल मंत्रीपद सुद्धा भूषवले. भाजप - सेना युती सरकारमध्ये मनोहर जोशी मुख्यमंत्री असताना त्यांच्यावर गैरव्यवहारांच्या आरोपांचा ठपका बसला. तेव्हा बाळासाहेब ठाकरेंनी जोशींचा राजीनामा घेतला आणि नारायण राणे मुख्यमंत्री झाले. अवघ्या 9 महिन्यांसाठी नारायण राणे राज्याचे मुख्यमंत्री बनले होते. मात्र, याच काळात आपला उत्तराधिकारी म्हणून बाळासाहेब ठाकरेंनी शिवसेना कार्याध्यक्षपदी उद्धव ठाकरेंची निवड केली आणि नारायण राणे प्रचंड दुखावले गेले.
काँग्रसमध्येही राणे अस्वस्थ : नारायण राणे यांनी काँग्रेसमध्ये 2005 मध्ये प्रवेश केला. परंतु काँग्रसमध्येही राणे अस्वस्थ होते. 2009 मध्ये आघाडी सरकारमध्ये असताना नारायण राणे यांना मुख्यमंत्री पदाची महत्त्वाकांक्षा होती. परंतु यांच्याकडे उद्योग खाते देण्यात आले. 2009 मध्ये काँग्रेस आघाडी सत्तेत आल्यावर राणेंना उद्योग खाते मिळाले. याच दरम्यान दिल्लीतील हायकामान सोनिया गांधी, अहमद पटेल, अशोक चव्हाण, पृथ्वीराज चव्हाण यांच्यावर टीका करून राणेंनी नाराजी ओढावून घेतली. आस्ते आस्ते दरी वाढत गेली आणि 2014 नंतर पंतप्रधान नरेंद्र मोदींच्या लाटेत फडणवीस मुख्यमंत्री झाल्यावर राणेंच्या त्यांच्यासोबत भेटीगाठी वाढत गेल्या. 2018 मध्ये अखेर राणेंनी काँग्रेस सोडली आणि स्वतःचा 'महाराष्ट्र स्वाभिमान पक्ष' काढला. याच दरम्यान नारायण राणे भाजपच्या तिकिटावर राज्यसभेवर गेले. नंतर नारायण राणे यांचा स्वाभिमानी पक्ष सुद्धा भाजपमध्ये विलीन झाला होता.
हेही वाचा -
