मुंबई - पहाटेच्या सुमारास जोगेश्वरी-विक्रोळी लिंक रोडवर झालेल्या अपघातामुळे जोगेश्वरी-विक्रोळी लिंकरोडकडे जाणारी वाहतूक ठप्प झाली होताी. या घटनेची माहिती मिळताच वाहतूक पोलिसांनी घटनास्थळी धाव घेत अपघातग्रस्त डंपर बाजूला काढला आहे. त्यानंतर काही वेळातच या मार्गावरील वाहतूक पूर्ववत झाली आहे.
चालकाचे नियंत्रण सुटल्याने भरधाव जाणारा मिक्सर डंपर मेट्रोचे काम सुरू असलेल्या बॅरिकेट्सवर जाऊन आदळला. त्यामुळे पहाटेपासून जोगेश्वरी-विक्रोळी लिंकरोडकडे जाणारी वाहतूक ठप्प होती. त्यानंतर जोगेश्वरी-विक्रोळी लिंकरोडवरच पुन्हा एक मोठा ट्रेलर रस्त्यामध्ये फसला. परिणामी पुन्हा एकदा वाहतूक ठप्प झाली. सकाळच्यावेळी कामावर जाणाऱ्या मुंबईकर चाकरमान्यांना याचा त्रास सहन करावा लागला.
हेही वाचा - चेंबूरमध्ये रास्ता रोको, जमावाची बसवर दगडफेक
जोगेश्वरीकडे-पश्चिम उपनगराकडे जाणारी वाहतूक पूर्णतः विस्कळीत झाली. या मार्गावरची वाहतूक साकीनाकाच्या दिशेने वळवण्यात आली. मात्र, गांधीनगर पूलापासून पवई पोलीस स्टेशनपर्यंत वाहनांच्या लांबचलांब रांगा लागल्या. क्रेनच्या सहाय्याने ट्रेलर बाजूला करण्याचे काम सुरू आहे.
