मुंबई - लेह येथे पूल निर्मितीच्या कामावेळी दरीत कोसळून वीरमरण आलेले जवान सचिन मोरे यांच्यावर आज मुळगावी होणार अंत्यसंस्कार... नाशकातील सिडको परिसरात नवविवाहितेची आत्महत्या.. या प्रकरणी ५ जणांवर गुन्हा नोंद केला आहे.. राष्ट्रवादीचे अध्यक्ष शरद पवार यांच्या विरोधात आक्षेपार्ह टीका केल्यानंतर आमदार गोपीचंद पडळकर यांना एका राष्ट्रवादीच्याच नगरसेवकाने समर्थन दिले आहे... रत्नागिरीत माजी खासदार निलेश राणे मुंबई गोवा महामार्गाच्या कामावरून आक्रमक झाल्याचे चित्र पाहायला मिळाले.. या सारख्या राज्य आणि देशातील सकाळी ९ वाजेपर्यंतच्या महत्वाच्या बातम्यांचा धावता आढावा...
मुंबई - पुणे - लेह येथे पूल उभारण्याच्या कामादरम्यान दरीत कोसळून वीरमरण पावलेले लष्कराच्या 115 इंजिनिअर्सच्या तुकडीतील नाईक सचिन मोरे यांचे पार्थिव शुक्रवारी (दि. 26 जून) सायंकाळी पुणे विमानतळावर खासगी विमानाने आणण्यात आले. यावेळी लष्कराच्या दक्षिण मुख्यालयातर्फे आणि हवाई दलातर्फे त्यांना मानवंदना देण्यात आली. त्यांचे पार्थिव पुण्यातून लष्करी वाहनाने त्यांच्या मालेगाव तालुक्यातील मूळगावी येथे नेण्यात आले. त्या ठिकाणी लष्करी इतमामात त्यांच्या पार्थिवावर अंत्यसंस्कार होणार आहेत.
वाचा सविस्तर -पुणे विमानतळावर हुतात्मा सचिन मोरे यांना लष्कराकडून मानवंदना; आज मुळगावी होणार अंत्यसंस्कार
नाशिक - सिडको परिसरातील पाटील नगर येथे राहणाऱ्या एका विवाहितेच्या आत्महत्ये प्रकरणी पतीसह पाच जणांवर आत्महत्येस प्रवृत्त केल्याचा गुन्हा अंबड पोलीस ठाण्यात दाखल करण्यात आला आहे.
वाचा सविस्तर -मरण कोणाला आवडतं? पण, मला आता जगायचं नाही म्हणत विवाहितेची आत्महत्या
नागपूर - मोठ्या बहिणीने मोबाईल दिला नाही या रागातून १४ वर्षीय मुलाने गळफास घेत आत्महत्या केल्याची धक्कादायक घटना घडली. ही घटना शहरातील जरीपटका परिसरात घडली आहे. नयन मगनाणी असे मृताचे नाव आहे. तो नवव्या वर्गात शिकत होता.
वाचा सविस्तर -धक्कादायक...! बहिणीने मोबाईल दिला नाही म्हणून भावाची आत्महत्या
रत्नागिरी - मुंबई गोवा महामार्गाच्या चौपदरीकरणाच्या कामाचा मुद्दा पुन्हा एकदा ऐरणीवर आला आहे. सध्या संथ गतीने सुरू असलेल्या आणि नागरिकांचा विरोध डावलून ठेकेदारांकडून काम सुरू असलेल्या ठिकाणांची पाहणी माजी खासदार निलेश राणे यांनी शुक्रवारी केली. रत्नागिरी जिल्ह्यातील लांजा आणि राजापूर या दोन तालुक्यातील कामांचा आढावा त्यांनी घेतला. यावेळी कामातील त्रृटी लक्षात घेत त्यांनी ठेकेदारांची कानउघडणी केली.
वाचा सविस्तर -मुंबई-गोवा महामार्गाच्या कामावरून निलेश राणेंनी अधिकाऱ्यांना झापलं, तर ठेकेदारांना धरलं धारेवर
हैदराबाद - कोरोना विषाणूने जगात थैमान घातले आहे. भारतातही कोरोनाचा विळखा झपाट्याने वाढत आहे. देशभरात शुक्रवारी सर्वाधिक 17 हजार 296 नवीन कोरोनाबाधितांची नोंद करण्यात आली. तर 407 रुग्णांचा मृत्यू झाला. यामुळे देशभरातील एकूण कोरोनाबाधितांची संख्या 4 लाख 90 हजार 401 वर पोहोचली आहे. केंद्रीय आरोग्य आणि परिवार कल्याण मंत्रालयाने दिलेल्या ताज्या आकडेवारीनुसार, देशात आतापर्यंत 15 हजार 301 कोरोनाबाधितांचा मृत्यू झाला आहे.
वाचा सविस्तर -देशभरातील कोरोनासंबंधी महत्वाच्या घडामोडी... वाचा एका क्लिकवर
सांगली - शरद पवारांवर टीका केल्या प्रकरणी राष्ट्रवादी काँग्रेसकडून भाजप आमदार गोपीचंद पडळकर यांचा निषेध होत आहे. मात्र, सांगलीत एका राष्ट्रवादी नगरसेवकाने आमदार पडळकर यांचे स्वागत करत चक्क दुचाकीवर शहरभर घेऊन फिरल्याचा प्रकार घडला आहे. जत नगरपालिकेचे नगरसेवक लक्ष्मण उर्फ टीमु एडके या राष्ट्रवादीच्या नगरसेवकाने हे धाडस केले आहे. त्यामुळे सांगली जिल्हा राष्ट्रवादी काँग्रेस याची दखल घेणार का? हा प्रश्न निर्माण झाला आहे.
वाचा सविस्तर -राष्ट्रवादीच्या 'या' नगरसेवकाकडून पडळकरांचे समर्थन.. दुचाकीवरून शहरभर फिरवले
मुंबई - कोरोनामुळे शेतकऱ्यांसह सर्व क्षेत्रात आर्थिक अडचण निर्माण झाली आहे. याच पार्श्वभूमीवर सरकारने राज्यातील कृषी व संलग्न अभ्यासक्रमांचे शैक्षणिक शुल्क भरण्यासाठी सवलत देण्याचा निर्णय घेतला आहे. राज्याचे कृषीमंत्री दादाजी भुसे यांनी शुक्रवारी ही माहिती दिली. यासंदर्भात राज्यातील कृषी विद्यापीठांच्या शिक्षण संचालक समितीमध्ये तसा ठराव करण्यात आल्याचेही कृषीमंत्र्यांनी स्पष्ट केले.
वाचा सविस्तर -कृषी विद्यार्थ्यांना अखेर दिलासा; राज्यातील कृषी व संलग्न अभ्यासक्रमांचे शैक्षणिक शुल्क भरण्यासाठी सवलत
मुंबई : एका बाजूला अनलॉक होत असताना राज्यात कोरोना रुग्णांची संख्या सातत्याने वाढत आहे. राज्यात आज(शुक्रवार) कोरोनाच्या ५ हजार २४ नवीन रुग्णांचे निदान झाले आहे. सध्या राज्यात ६५ हजार ८२९ रुग्णांवर (ॲक्टिव्ह) उपचार सुरू आहेत. आज २३६२ रुग्णांना घरी सोडण्यात आले असून एकूण संख्या ७९ हजार ८१५ झाली आहे. राज्यातील रुग्ण बरे होण्याचे प्रमाण (Recovery Rate) ५२.२५ टक्के एवढे झाले आहे, अशी माहिती आरोग्यमंत्री राजेश टोपे यांनी शुक्रवारी दिली.
वाचा सविस्तर -कोरोना अपडेट : शुक्रवारी सर्वाधिक ५०२४ नव्या रुग्णांची नोंद, १७५ जणांचा मृत्यू
मुंबई - ठाणे जिल्ह्यातील कोरोना साथीचा संसर्ग रोखणे खूप गरजेचे आहे. त्यासाठी 'ट्रॅक एन्ड ट्रेस'वर जास्तीत जास्त भर देऊन प्रत्येक रुग्णाचे जास्तीत जास्त संपर्क शोधणे महत्त्वाचे आहे, अशी गरज मुख्यमंत्री उद्धव ठाकरे यांनी व्यक्त केली. तसेच इतर महापालिकांनी रुग्णांना बेड मिळवून देऊन त्यांच्यावर वेळेवर उपचार करावेत, असे निर्देश मुख्यमंत्र्यांनी यावेळी दिले.
वाचा सविस्तर -कोरोनावर मात करण्यासाठी 'ट्रॅक अॅन्ड ट्रेस'वर भर द्या - मुख्यमंत्री
सोलापूर - बनावट कागदपत्रे सादर करून तब्बल 32 वर्षे शिक्षकी नोकरी केल्याचा धक्कादायक प्रकार समोर आला आहे. आमसिद्ध भिकप्पा बिराजदार असे शिक्षकाचे नाव आहे. या शिक्षका विरोधात वळसंग पोलीस ठाण्यात गुन्हा दाखल करण्यात आला आहे. तो अहेरवाडी येथील जिल्हा परिषद शाळेत सहायक शिक्षक या पदावर कार्यरत होता. सद्या त्याच्यावर निलंबनाची कारवाई सुरू आहे.
वाचा सविस्तर -धक्कादायक...! बनावट कागदपत्रे सादर करुन त्याने केली तब्बल 32 वर्षे शिक्षकाची नोकरी
