मुंबई - गेल्या साडेचार वर्षांमध्ये शिक्षण खात्यामध्ये अत्यंत अनागोंदी कारभार चालू आहे. बारावी आणि दहावीच्या गुणदानात बदल करण्यात आल्यामुळे शालान्त परीक्षेचा निकाल कमी लागला आहे. शिक्षण खात्याच्या अनागोंदी कारभारामुळे अकरावी प्रवेशासाठी पालकांना कसरत करावी लागत आहे. याची राज्याच्या मुख्यमंत्र्यांनी दखल घेत शिक्षणमंत्र्यांचा राजीनामा घ्यावा, आशी मागणी राष्ट्रवादी विद्यार्थी काँग्रेसने केली आहे.
यावर्षी शालान्त परीक्षेचा निकाल कमी लागल्यामुळे पालकांना आणि विद्यार्थ्यांना अकरावी प्रवेशासाठी कसरत करावी लागणार आहे. दरवर्षी निकाल जाहीर झाल्यानंतर दुसऱ्या दिवशी अकरावीची प्रवेश प्रक्रिया सुरू होते. मात्र, यंदा अद्याप प्रवेश कशाच्या आधारावर द्यायचा याबाबत स्पष्टता नसल्याने ही प्रक्रिया लांबणीवर जाणार असल्याचे दिसत आहे.
यावर्षी अकरावीचा अभ्यासक्रम बदलण्यात आलेला आहे. त्या अभ्यासक्रमाची नवीन पुस्तके देखील अजून बाजारात आलेली नाहीत. या परिस्थितीमध्ये विद्यार्थ्यांना संकटात घालण्याचे काम शिक्षणमंत्री करत आहेत, असा आरोप अमोल मातेले यांनी केला आहे.
केंद्रीय बोर्डाच्या परीक्षेचा निकाल आणि महाराष्ट्र राज्याच्या बोर्डाच्या परीक्षेचा निकाल यामध्ये मोठी तफावत दिसून येते आहे. यामध्ये शिक्षणमंत्र्यांची मानसिकता ही केंद्रीय बोर्डांच्या शाळेच्या हिताचे निर्णय घेताना दिसून येत आहे. महाराष्ट्र राज्यातील मराठी माणसाच्या हितासाठी व मराठी विद्यार्थ्यांसाठी कुठेच निर्णय घेतलेला दिसत नाही.
गेली चार साडेचार वर्षांमध्ये शिक्षण खात्यामध्ये अत्यंत अनागोंदी कारभार चालू आहे. याची राज्याच्या मुख्यमंत्री दखल घ्यावी आणि शिक्षण मंत्र्यांना राजीनामा द्यावा, अशी मागणी ई-मेलद्वारे मुंबई राष्ट्रवादी विद्यार्थी काँग्रेसचे मुंबई अध्यक्ष अॅडवोकेट अमोल मातेले यांनी केली आहे.
