मुंबई - माहीम परिसरातून फुटपाथवर झोपलेल्या एका महिलेचे 2 महिन्यांचे बाळ चोरून ते 25 हजार रुपयांना विकण्याच्या प्रयत्नात असणाऱ्या आरोपीला दादर जीआरपी पोलिसांनी अवघ्या तासाभरात दादर रेल्वेस्थानकातून अटक केली आहे. तसेच ते बाळ सुखरूप त्याच्या आईकडे सोपवले आहे. 26 जूनच्या पहाटेची ही घटना आहे. शहाबाज बक्षी शेख (26) असे त्या आरोपीचे नाव आहे.
माहीम रेल्वे स्थानकाच्या बाहेर फुटपाथवर मधू अर्जुन परमार (30) ही महिला तिची दोन जुळी मूले चंदू व गणेश यांच्यासह झोपली होती. अचानक जाग आल्यावर मधूला तिच्या दोन मुलांपैकी चंदू हा गायब असल्याचे लक्षात आले. घाबरलेल्या मधूने माहीम पोलीस ठाण्यात बाळ हरवल्याची तक्रार दाखल केली. तक्रार दाखल केल्यानंतर पीडित महिला दादर रेल्वेस्थानकात आल्यावर तिने दादर रेल्वे पोलिसांना याबद्दल माहिती दिली. घटना जरी माहीम पोलिसांच्या हद्दीत घडली असली तरी परिस्थितीचे गांभीर्य ओळखून दादर जीआरपी पोलिसांनी तत्काळ पहाटे 3 वाजता दोन टीम बनवून बाळाचा शोध घेतला असता, दादर रेल्वे स्थानकावरील मध्य व पश्चिम दिशेला जोडणाऱ्या स्काय वॉकखाली एक व्यक्ती बाळासह आढळून आला.
25 हजारांच्या मोबदल्यात बाळ चोरले
पोलिसांनी शहाबाज बक्षी शेख (26) या आरोपीला बाळाबद्दल हटकले असता आरोपीने उडवाउडवीची उत्तरे देण्यास सुरुवात केली. पोलिसांनी आरोपीला ताब्यात घेऊन बाळ आईला दाखवले असता, चोरीला गेलेले हेच बाळ आपले असल्याचे मधू परमार हिने ओळखले. अटक करण्यात आलेल्या आरोपीला कळवा येथील एका व्यक्तीने 25 हजारांच्या मोबदल्यात बाळ चोरण्यास सांगितले होते. बाळ चोरून पहाटे 4 वाजता पहिल्या ट्रेनने आरोपी शहाबाज हा कळवा येथे जाऊन बाळाला विकणार असल्याचे पोलीस तपासात समोर आले आहे. मात्र, पोलिसांच्या सतर्कतेमुळे तात्काळ कारवाई करण्यात आल्याने 2 महिन्यांची बाळाची त्याची त्याच्या आईसोबत पुन्हा भेट झाली आहे. या संदर्भात पोलिसांनी कलम 363, 370, 34 नुसार गुन्हा नोंदवून माहीम पोलीस ठाण्याकडे गुन्हा वर्ग करण्यात आला आहे.
