मुंबई : ईडीने बुधवारी उशिरा रात्री शिवसेना नेते संजय राऊत यांचे निकटवर्तीय सुजित पाटकर आणि महापालिकेचे डॉ. किशोर बिसुरे यांना अटक केली. सूत्रांनी दिलेल्या माहितीनुसार, लाईफ लाईन हॉस्पिटल मॅनेजमेंट सर्व्हिसेस कंपनीची स्थापना २०२० मध्ये झाली. ही कंपनी स्थापन झाल्यापासून महिन्याच्या आत कोणताही पूर्वानुभव नसताना कंपनीला हे कंत्राट मिळाले.
वरळी आणि दहिसर कोविड सेंटरवर वैद्यकीय सेवा, डॉक्टर, नर्सेस पुरवण्यासाठी कंपनीला एकूण ३२ कोटी रुपये महापालिकेकडून मिळाले होते. मात्र, कोविड सेंटरवर जितक्या वैद्यकीय कर्मचाऱ्यांची आवश्यकता होती, त्यापैकी केवळ ५० ते ६० टक्केच डॉक्टर आणि अन्य कर्मचारी नेमण्यात आले होते. उर्वरित कर्मचाऱ्यांची बोगस उपस्थिती दाखवत कंपनीने बनावट बिले सादर करून पालिकेकडून पैसे उकळल्याचा ठपका ईडीने ठेवला. सुजित पाटकर यांच्या कंपनीला जे ३२ कोटी रुपये प्राप्त झाले. त्यापैकी केवळ आठ कोटी कोविड सेंटरवरील कामासाठी खर्च केले. आणि उर्वरीत पैसे हे वेगवगळ्या कंपन्यांच्या नावाने स्वतःसाठी वळवल्याचा फटका पाटकरांवर आहे.
२४ कोटी विविध बनावट कंपन्यांच्या माध्यमातुन फिरवूण्यात आले. आणि ते स्वतःसाठी वापरण्यात आले असा आरोप ईडीने केला आहे. हे पैसे कसे आणि कुठे फिरवण्यात आले. तसेच ते कुणाला मिळाले याचा पुढील तपास सुरु आहे महाराष्ट्रात नोंदणीकृत नसलेल्या कोणत्याही भागीदारी कंपनीला सरकारी कंत्राट दिले जात नाही. असे असतानाही कोविड काळात मुबंई महापालिकेने सुजित पाटकर यांना कंत्राट दिले.
या कामात सुजित पाटकर यांनी १०० कोटींचा गैरव्यवहार केल्याचा दावा भाजपा नेते किरीट सोमय्या यांनी केला होता. यावर भूमिका स्पष्ट करताना मुंबई महापालिकेने म्हणले होते की, लाईफलाईन कंपनीला केवळ डॉक्टर, परिचारिका, तंत्रज्ञ आणि वॉर्डबॉय आदी मनुष्यबळ पुरवण्याचेच काम योग्य प्रक्रियेचे पालन करून देण्यात आले होते.
हेही वाचा
