मुंबई : काही भागांमध्ये पाऊस पडला. त्या पावसामुळे काही भागांमध्ये पेरणीही झाली. काही भागांमध्ये पाऊसच कमी आहे. काही विदर्भाचा आणि मराठवाड्याचा भाग आहे. पाऊस कमी पडल्यामुळे तिथे पेरण्या उशिरा झाल्या. ज्या पेरण्या झाल्या त्या उगवल्या नाहीत. त्याची तक्रार माझ्याकडे आलेली आहे, अशी माहिती राज्याचे कृषी मंत्री अब्दुल सत्तार यांनी दिली आहे.
कमी पावसामुळे शेतकरी अडचणीत : पेरण्या करायला 100 मिलिमीटर तरी पाऊस पडायला पाहिजे, असे कृषी विभागाकडून आम्ही शेतकऱ्यांना सांगितले होते. परंतु, शेतकरी बांधवांनी तरीही पेरणी केली. त्यांच्यासाठी महाबीज किंवा बाकीच्या कंपनींकडून चांगल्या दर्जाचे बी मिळाले पाहिजे. नाहीतर एकदा अपयश आल्यानंतर पुन्हा पेरणी करून जर अपयश आले तर ते योग्य नाही. सर्व कंपन्यांना आदेश देण्यात आलेत. पुण्यातील कृषी आयुक्त परिस्थितीवर नियंत्रण ठेवून आहेत. तर कोणत्या दिवशी किती पाऊस कशा पद्धतीने पडला आणि त्या ठिकाणची स्थिती काय या आहे, बियाणे, खत कुठे कमी पडतात याचा आढावा घेतला जाईल; कारण आता आमच्याकडे 96 टक्के पावसाचा अंदाज हवामान खात्याने दाखवला आहे.
शेतकऱ्यांनी कमी मुदतीची पिके घ्यावी : हवामान खात्याने दाखवलेल्याप्रमाणे जर 90 टक्के पाऊस पडला तर त्याप्रमाणे आखणी केली जाईल. मात्र, त्यापेक्षा अधिक जरी पाऊस पडला तरी आताच्या काळात न पडलेल्या पावसाची तूट भरून काढता येणार नाही. यासाठी आता शेतकऱ्यांनी कमी मुदतीची पिके घ्यावीत, असे आवाहन आम्ही करत आहोत.
दुबार पेरणीबाबत उचित निर्णय घेऊ : शेतकऱ्यांना आता योग्य आणि चांगली बियाणी मिळावी त्यासाठी आम्ही प्रयत्न करत आहोत. कारण त्यांनी पेरणी केल्यानंतर पीक खात्रीने आले पाहिजे. राज्यात दुबार पेरणीचे संकट आता आहे. दुबार पेरणी करणाऱ्या शेतकऱ्यांना काही मदत करता येते का, याबाबत मंत्रिमंडळ बैठकीत आम्ही निर्णय घेणार आहोत.
15 जुलैपर्यंत पेरणी : शेतकऱ्यांनी हवालदिल होऊन जायची गरज नाही. सरकार शेतकऱ्यांच्या पाठीशी आहे असे सांगतानाच अब्दुल सत्तार म्हणाले की, गेल्या 13 वर्षांची आकडेवारी जर आपण पाहिली तर 13 वर्षांपैकी 8 वर्षांमध्ये 15 जुलैच्या आसपासच पेरण्या झाल्या आहेत. त्यामुळे शेतकऱ्यांनी घाबरून जाण्याची गरज नाही. त्यांना निश्चितच मदत केली जाईल, असेही सत्तार म्हणाले.
शेतकऱ्यांसाठी ॲप : देशातील आणि राज्यातील एकूण हवामानाची परिस्थिती पावसाची परिस्थिती कशी आहे, कशा पद्धतीची पेरणी केली पाहिजे, खते केव्हा दिली पाहिजेत याबाबतीत मार्गदर्शन करणारे एक ॲप तयार करण्यात आले आहे. कृषी आयुक्तांमार्फत कोणत्या जिल्ह्यात नेमकी काय परिस्थिती निर्माण होईल याचा अंदाज घेऊन त्याप्रमाणे आखणी करण्यात येत आहे. तसेच राज्य शासनाने काही टोल फ्री नंबरही उपलब्ध करून दिले आहेत. शेतकऱ्यांना मार्गदर्शन अथवा तक्रार करायची असेल तर त्या माध्यमातून करता येईल, असेही त्यांनी यावेळी सांगितले.
