मुंबई - गेल्या नऊ महिन्यांच्या कोविड संक्रमण काळात राज्याच्या उत्पादन शुल्क विभागाने विविध ठिकाणी कारवाई करून 74 कोटी 16 लाखांचा मुद्देमाल जप्त केला आहे. राज्य उत्पादन शुल्क विभागाकडून एप्रिल 2020 ते 22 डिसेंबर 2020 पर्यंत करण्यात आलेल्या कारवाईत 32 हजार 228 गुन्हे नोंदविण्यात आलेले आहेत. यात 19,462 आरोपींना अटक करण्यात आली आहे. तर 74 कोटी 16 लाख रुपयांचा मुद्देमाल जप्त करण्याबरोरबच 2,663 वाहने जप्त करण्यात आल्याची माहिती राज्य उत्पादन शुल्क विभागाचे आयुक्त कांतीलाल उमाप यांनी दिली.
बनावट मद्य विक्रीचे एकूण 71 गुन्हे
हातभट्टी दारू निर्मिती-विक्री आणि वाहतुकीत आतापर्यंत नऊ महिन्यांच्या कालावधीत 18,786 गुन्हे नोंदविण्यात आलेले असून 7,028 आरोपींना अटक करण्यात आलेली आहे तर 34 कोटी 31 लाख रुपयांचा मुद्देमाल जप्त करण्यात आला आहे. अवैधपणे परराज्यातील मद्य विक्री बाबत आतापर्यंत एकूण 765 गुन्हे नोंदविण्यात आलेले असून 656 आरोपींना अटक करण्यात आलेली आहे तर 13 कोटी 31 लाख रुपयांचा मुद्देमाल जप्त करण्यात आला आहे. मद्यार्काची अवैध वाहतुकीबाबत एकूण 182 गुन्हे नोंदविण्यात आलेले असून 214 आरोपींना अटक करण्यात आलेली आहे तर 4 कोटी 42 लाख रुपयांचा मुद्देमाल जप्त करण्यात आलेला आहे. तसेच बनावट मद्य विक्रीचे एकूण 71 गुन्हे नोंदविण्यात आलेले असून 79 आरोपींना अटक करण्यात आलेली आहे तर 2 कोटी 3 लाख रुपयांचा मुद्देमाल जप्त करण्यात आलेला आहे.
नंदुरबारमधील कारवाई
परराज्यातील अवैध मद्य ही जप्त करण्यात आलेले आहे. तसेच नाशिक येथे हरियाणा आणि गोवा राज्य निर्मित विदेशी मद्याचे एकूण 1,076 बॉक्स आणि 1 ट्रक असा एकूण 93 लाख 63 हजार 420 रुपयांचा मुद्देमाल जप्त करण्यात आला आहे. यामध्ये 2 आरोपींना अटक करून त्यांच्यावर गुन्हा नोंदविण्यात आला आहे. नंदुरबार येथे मध्यप्रदेश राज्य निर्मित विदेशी मद्याचे एकूण 500 बॉक्स आणि 1 ट्रक असा एकूण 43 लाख 92 हजार 900 रुपयांचा मुद्देमाल जप्त करण्यात आला आहे. यामध्ये 3 आरोपींना अटक करुन त्यांच्यावर गुन्हा नोंदविण्यात आला आहे.
गोवा राज्य निर्मित विदेशी मद्यावर कारवाई
तसेच धुळे येथे गोवा राज्य निर्मित विदेशी मद्याचे व बिअरचे एकूण 1250 बॉक्स आणि 2 वाहने असा एकूण 65 लाख 30 हजार रुपयांचा मुद्देमाल जप्त करण्यात आला आहे. यामध्ये एका आरोपीला अटक करून त्याच्यावर गुन्हा नोंदविण्यात आला आहे. सोलापूर येथे गोवा राज्य निर्मित विदेशी मद्याचे एकूण 150 बॉक्स आणि मद्य बाटल्यावरील 20,000 बनावट लेबल असा एकूण 11 लाख 81 हजार 010 रुपयांचा मुद्देमाल जप्त करण्यात आला आहे. यामध्ये एका आरोपीला अटक करून त्यांच्यावर गुन्हा नोंदविण्यात आला आहे. पुणे येथे विविध मद्याच्या एकूण 710 बॉक्स, बिअरचे 190 बॉक्स आणि 1 ट्रक असा एकूण 56 लाख 48 हजार 100 रुपयांचा मुद्देमाल जप्त करण्यात आला आहे. यामध्ये 3 आरोपींना अटक करून त्यांच्यावर गुन्हा नोंदविण्यात आला आहे.
मुंबईतील अंधेरी आणि वांद्रे येथील कारवाई
रत्नागिरी -कणकवली येथे गोवा राज्य निर्मित विदेशी मद्याचे 2,700 ब.लि. मद्य आणि एक टेम्पो असा एकूण 21 लाख 50 हजार रुपयांचा मुद्देमाल जप्त करण्यात आला आहे. यामध्ये एका आरोपीला अटक करुन त्यांच्यावर गुन्हा नोंदविण्यात आला आहे. मुंबईतील अंधेरी आणि वांद्रे येथून विविध ब्रॅण्डच्या परदेशी स्कॉच मद्याच्या एकूण 97 सिलबंद बाटल्या आणि 3 वाहने असा एकूण 10 लाख 23 हजार 700 रुपयांचा मुद्देमाल जप्त करण्यात आला आहे. यामध्ये 6 आरोपींना अटक करुन त्यांच्यावर गुन्हा नोंदविण्यात आला आहे. त्याचबरोबर उपनगर चेंबूर येथून बनावट विदेशी मद्याच्या एकूण 348 बाटल्या असा एकूण 22 लाख 04 हजार 392 रुपयांचा मुद्देमाल जप्त करण्यात आला आहे. यामध्ये 2आरोपींना अटक करुन त्यांच्यावर गुन्हा नोंदविण्यात आला आहे. अन्य एक ठिकाणी बनावट विदेशी मद्याच्या 20 बॉटल आणि एक रिक्षा असा एकूण 2 लाख 25 हजार रुपयांचा मुद्देमाल जप्त करण्यात आला आहे. यामध्ये 2आरोपींना अटक करुन त्यांच्यावर गुन्हा नोंदविण्यात आला आहे.
