मुंबई - गेल्या २ दिवसांत मोनो रेलच्या दुसऱ्या टप्प्यातून मुंबई शहर रेल्वे प्राधिकरणाला ८ लाख रुपये उत्पन्न मिळाले आहे. वडाळा ते संत गाडगे महाराज बाबा चौक(सातरस्ता) या मोनो रेलच्या दुसऱ्या टप्प्याचे रविवारी मुख्यमंत्री देवेंद्र फडणवीस व रेल्वेमंत्री पियुष गोयल यांनी उद्घाटन केले. या २ दिवसांत ४६ हजार ९७८ प्रवाशांनी प्रवास केला.
मोनोच्या दुसऱ्या टप्प्यातील वडाळा ते सातरस्ता दरम्यान कामावर जाणाऱ्या प्रवाशांनी मोनोने प्रवास केला. यामध्ये मंगळवारी २३ हजार ३२१ प्रवाशांनी प्रवास केला. त्यामधुन ४ लाख १० हजार २८४ रुपये उत्पन्न मिळाले. तर सोमवारी २३ हजार ६५७ प्रवाशांनी प्रवास केला. यातून ४ लाख ४८ हजार ५३७ रुपये उत्पन्न मिळाले.
दुसऱ्या टप्प्यातील मोनो रेलमध्येही स्थानकांची नावे जुनीच देण्यात आली आहेत. या टप्प्यातील प्रवासी भाडे ५ रुपयांनी कमी करावे, अशी मागणी प्रवाशांकडून करण्यात आली आहे. मोनोतून कामावर जाणाऱ्या प्रवाशांव्यतिरिक्त मोनोतून प्रवासाचा आनंद घेण्यासाठी अनेक प्रवाशांनी कुटुंबासह प्रवास केला.
