मुंबई : पक्षप्रमुख उद्धव ठाकरेंनी पोहरादेवीची खोटी शपथ घेतल्याची टीका उपमुख्यमंत्री देवेंद्र फडणवीस यांनी केली होती. खासदार संजय राऊतांनी यावरून फडणवीसांना खडेबोल सुनावले आहे. पोहरादेवी जागृत देवस्थान आहे. कोणीही तिची खोटी शपथ घेणार नाही. परंतु, राजकारणासाठी फडणवीस पोहरादेवीला खोटे पाडत आहेत. पोहरादेवीचा हा अपमान आहे, असा आरोप राऊतांनी केला. तसेच राष्ट्रवादी कॉंग्रेसच्या अजित पवार गटासोबत भाजपने केलेल्या युतीवर कानपिचक्या दिल्या.
2019 च्या सत्तातंराचा दाखला : उपमुख्यमंत्री देवेंद्र फडणवीस यांनी जाहीर कार्यक्रमात 2019 च्या सत्तातंराचा दाखला दिला. ठाकरेंमुळे शिवसेना-भाजप युतीत दरी निर्माण झाली. आता पोहरादेवीची खोटी शपथ घेत आहेत, अशी टीका फडणवीसांनी केली होती. संजय राऊतांनी फडणवीसांच्या टीकेला प्रत्युत्तर दिले. मुख्यमंत्री एकनाथ शिंदे यांच्यावर ही यावेळी निशाणा साधला. उद्धव ठाकरेंनी पोहरादेवीची खोटी शपथ घेतली, असे म्हणणे हा पोहरादेवीचा अपमान आहे. तेथील समाजाच्या अनेक नेत्यांनी फोन केले आहेत. फडणवीस हे वारंवार आमच्या पोहरादेवीचा अपमान करत असल्याचे त्यांचे म्हणणे आहे. पोहरादेवी हे तेथील जागृत देवस्थान आहे. तिची कोणीही खोटी शपथ घेणार नाही. परंतु, सत्तेच्या राजकारणासाठी पोहरादेवीला खोटे पाडत आहेत, असा टोला राऊत यांनी लगावला.
आरोपांवरून फडणवीसांना आरसा : ठाकरेंनी राष्ट्रवादी कॉंग्रेस, कॉंग्रेससोबत महाविकास आघाडी केल्याच्या मुद्द्यावर फडणवीसांनी अनेक आरोप केले होते. राऊतांनी या आरोपांवरून फडणवीसांना आरसा दाखवला आहे. तुम्ही राष्ट्रवादीबरोबर गेलात हा अधर्म, कुटनीती राजकारण. मग शिवसेना जेव्हा राष्ट्रवादीबरोबर गेली तेव्हा ते काय होते? विश्वासघात का, असा प्रश्न राऊत यांनी फडणवीसांना विचारला आहे. कुटनीती, चाणक्य नीती, विदुरनीतीचे उत्तर देवेंद्र फडणवीस यांनी महाराष्ट्राच्या जनतेला द्यावे, अशी मागणी केली. तसेच फडणवीस वैफल्यग्रस्त झाले असून अशी चुकीची विधान करत आहेत. तुमचे हसे होत आहे, कृपया अशी विधाने करू नका, असा सल्ला राऊत यांनी देवेंद्र फडणवीस यांना दिला. आगामी काळात कुटनीती वापरणाऱ्या लोकांना सत्तेपासून दूर ठेवण्यासाठी आम्ही एकत्र आल्याचे राऊत म्हणाले.
राऊतांचा फडणवीसांवर हल्लाबोल : मुख्यमंत्री शिंदे यांच्या मेळाव्यावर राऊतांनी सडकून टीका केली. ठाण्यात 'फु बाई फु'चा कार्यक्रम झाला. मुख्यमंत्री सातत्याने समर्थकांना समजावण्याचा प्रयत्न करत असल्याचे समजते. राष्ट्रवादीबरोबर आपण जे गेलो आहोत, ते बेरजेचे राजकारण आहे. परंतु, बेरजेचे आहे की खर्जेचे महाराष्ट्राची जनतेने पाहिल्याचे राऊत म्हणाले. तसेच ज्या बेरजेच्या राजकारणात, शिंदे गटाने अडीच वर्षे सत्ता भोगली. त्याच राज्याचे उपमुख्यमंत्री मुख्यमंत्री आपण किती खोटारडे आहोत फसवणूक करत आहोत, दे दाखवून देत आहेत. सध्या ते कोणत्या नशेत आहेत. त्यांना कोणती भांग, कोणी पाजली हेच कळत नाही, अशा शब्दांत समाचार घेतला. फडणवीस, शिंदे खोटे बोलतात. अजित पवारांना अजून कंठ फुटायचा आहे. तेव्हा आम्ही बोलूच पण मला त्यात पडायचे नाही, असे राऊतांनी सांगितले.
देश हुकुमशाहीकडे वळला : सध्या महायुतीत आलेले दोन्ही गट राजकारणात टिकू द्या, मग पुढल्या पंधरा वर्षाचा गोष्टी करा. हा देश हुकुमशाहीकडे पूर्णपणे वळला आहे. देशात दिल्लीसारख्या राजधानीला पुराचा वेडा आहे. मणिपूर जळत आहे. राफेलचा सौदा काही लोकांना त्यात कमिशन मिळावे, यासाठी केला जातो आहे. एकंदरीत हुकूमशाही सुरु असल्याचा आरोप राऊत यांनी केला. केंद्रीय यंत्रणाच्या माध्यमातून विरोधी पक्षाला संपवण्यासाठी सध्या सत्ता आणली आहे. दुसरीकडे गळ्यातील पट्टा गेला, असा आरोप मुख्यमंत्री करत आहेत. परंतु, ठाकरेंच्या गळ्यातील पट्टा गेला आहे. मात्र, तुमच्या गळ्यात गुलामीचा पट्टा पडला आहे. त्या गुलामीच्या पट्ट्याची तुम्ही काळजी करा. अशा अनेक कुत्र्यांच्या गळ्यामध्ये पट्टे आहेत. जे आराम, वैभवात राहत आहेत. तो पट्टा गुलामीचा असतो, ते त्यांना ठावूक नसते, अशा शब्दांत जोरदार हल्लाबोल राऊतांनी चढवला.
हेही वाचा :
- Sanjay Raut Reaction: दिल्लीवाले महाराष्ट्राची मजा पाहत आहेत; खासदार राऊत संतापले
- Sanjay Raut on Devendra Fadnavis: गुन्हेगारांना बाहेर काढण्यासाठी मुख्यमंत्री कार्यालयातून डीलिंग सुरू, संजय राऊतांच्या नव्या आरोपाने खळबळ
- Sanjay Raut criticized Devendra Fadnavis: कलंकित सरकारमध्ये फडणवीस अंगाला हळद लावून बसलेत - खासदार संजय राऊत
