मुंबई - लॉकडाऊनमुळे चित्रपटगृहे तब्बल ७-८ महिने बंद होती. ती आता सुरु करण्यात आली आहेत. परंतु म्हणावा तसा प्रतिसाद प्रेक्षककांकडून मिळत नसल्याने मोठे सिनेमे प्रदर्शित होत नाही आहे. यामुळे सिनेमागृह मालकांचे आर्थिक नुकसान होत आहे. याच पार्श्वभूमीवर थिएटर एक्झिबिटर असोसिएशनने काही दिवसांपूर्वी सलमान खानने त्याचा त्याचा आगामी चित्रपट ‘राधे’ चित्रपटगृहांतच प्रदर्शित करावा, अशी मागणी केली होती. त्यांच्या मागणीला मान देत ‘राधे’ चित्रपट चित्रपटगृहांतच प्रदर्शित होणार असल्याचे चित्रपटाच्या निर्मात्यांनी म्हटले आहे.
थिएटरमध्ये जाऊन ‘राधे’ चा आनंद घ्यावा -
त्याच अनुषंगाने स्वतः सलमान खानने आपल्या समाज माध्यमावर एक संदेश टाकला आहे. 'मला उत्तर देण्यासाठी विलंब झाला, याबद्दल क्षमस्व. या ‘पँडेमिक’ पर्वात असा निर्णय घेणे ही मोठी गोष्ट आहे. मला कल्पना आहे की चित्रपटगृह मालक व प्रदर्शनकर्ते सध्या आर्थिक कोंडीत सापडलेले आहेत. त्यांना माझ्याकडून मदतीचा हात पुढे करत मी, सर्वानुमते, असे सांगू इच्छितो की ‘राधे’ चित्रपटगृहांतच प्रदर्शित केला जाईल, या ईदला. परंतु मी असेही आवाहन करतो की थिएटर मालकांनी चित्रपटगृहात ‘राधे’ बघण्यासाठी येणाऱ्या प्रेक्षकांची योग्य काळजी घ्यावी व सरकारच्या नियमांचे उल्लंघन होणार नाही व सुरक्षेला प्रथम प्राधान्य द्यावे, इन्शाल्लाह, ‘राधे’ २०२१ मधील ईदच्या दिवशी प्रदर्शित होईल. सर्वांनी थिएटरमध्ये जाऊन ‘राधे’ चा आनंद घ्यावा.', असे त्याने म्हटले आहे.
‘दबंग ३’ नंतर प्रभुदेवा आणि सलमान पुन्हा एकत्र -
यावर्षी ईदच्या दिवशी चित्रपटगृहांमध्ये आपला चित्रपट ‘राधे’ प्रदर्शित करणार असल्याची घोषणा सलमानने केली आहे. आतापर्यंत सलमान खानचे बजरंगी भाईजान, दबंग, किक, एक था टायगर, बॉडीगार्ड यासारखे चित्रपट ईदला रिलीज झाले होते. ‘राधे’ चे दिग्दर्शन प्रभुदेवा करीत असून ‘दबंग ३’ नंतर प्रभुदेवा आणि सलमान पुन्हा एकत्र येत आहेत. या चित्रपटामध्ये सलमान खान, जॅकी श्रॉफ, जरीना वहाब आणि रणदीप हूडा यांच्या प्रमुख भूमिका असून दिशा पटनी मुख्य भूमिकेत आहे. सलमान खान आणि सलमा खान, सोहेल खान व विवेक अग्निहोत्री यांनी ‘राधे’ ची निर्मिती केली आहे.
हेही वाचा - देशी बनावटीच्या मेट्रोचे 29 जानेवारीला मुख्यमंत्री ठाकरेंच्या हस्ते अनावरण
