मुंबई - सध्या पहिल्या पावसाचा फटका वाहनचालकांना बसत आहे. पूर्व दृतगती महामार्गावर सकाळच्या सुमारास ब्रेक न लागल्यामुळे तीन वाहनांचा अपघात झाला. यामुळे ठाणे मार्गावर सकाळच्या वेळेस मोठी वाहतूक कोंडी झाली होती.
भांडुप पूर्व द्रुतगती मार्गावर मंगळवारी सकाळच्या सुमारास झालेल्या विचित्र अपघातामुळे या मार्गावर वाहतूक कोंडीचा सामना वाहन चालकांना करावा लागला. ठाण्याच्या दिशेने भरधाव जाणार्‍या एका ट्रकची धडक टेम्पोला बसली. ट्रक जागेवर पलटी झाला. यात मागून येणाऱ्या एका वाहनालाही फटका बसला. यामुळे ठाण्याच्या दिशेकडील वाहतूक तब्बल तासभर खोळंबली.
भांडुप पूर्व द्रुतगती मार्गावरील वाहतूक आणि अपघातग्रस्त ट्रक
वाहतूक पोलिसांनी घटनास्थळी पोहोचून क्रेनच्या सहाय्याने हा ट्रक बाजूला केला आणि वाहतूक सुरळीत केली. या घटनेत कुठलीही जीवितहानी झाली नसली तरी पूर्व द्रुतगती मार्गावरील वाहतूक या अपघातामुळे प्रभावित झाली.
