Union Budget 2023 : एमयूटीपी प्रकल्पांना निधीची गरज; रेल्वेच्या बजेटमध्ये निधी देण्याची प्रवासी संघटनांची मागणी

मुंबईची लाईफ लाईन म्हणून रेल्वेची ओळख आहे. या लाइफलाईनमधून दिवसाला ७० लाखांहून अधिक प्रवासी प्रवास करतात. इतक्या मोठ्या संख्येने प्रवासी प्रवास करत असताना या प्रवाशांना सुरक्षित आणि चांगली सुविधा मिळत नाही. यामुळे प्रवाशांना चांगल्या आणि सुरक्षित सुविधा मिळण्यासाठी एमयूटीपी २ आणि ३ सुरु करण्यात आले होते. या प्रकल्पांना केंद्र सरकारने बजेटमध्ये निधी देण्याची गरज असल्याची मागणी प्रवासी संघटनेने केली आहे.

मुंबई : मुंबईमध्ये मध्य, हार्बर आणि पश्चिम या मार्गावर रेल्वे चालवली जाते. मध्य रेल्वे मार्गावर छत्रपती शिवाजी महाराज टर्मिनस ते कसारा कर्जत खोपोली या मार्गावर, हार्बर मार्गावर छत्रपती शिवाजी महाराज टर्मिनस ते पनवेल गोरेगाव या मार्गावर तर पश्चिम रेल्वे मार्गावर चर्चगेट ते विरार डहाणू पर्यंत रेल्वे चालवली जाते. मुंबई ही भारताची आर्थिक राजधानी असल्याने तसेच कोणीही नोकरीनिमित्त मुंबईत येते. दोन वेळच्या जेवणाची सोय सहज करू शकत असल्याने मुंबईमधील लोकसंख्या सतत वाढत आहे. सर्वसामान्य नागरिकांना रेल्वे प्रवास परवडत असल्याने ७० लाखाहून अधिक प्रवासी रेल्वेने प्रवास करतात.

एमयुटीपी प्रकल्प रखडले : रेल्वेने लाखो जण प्रवास करतात. यामुळे ट्रेनला मोठ्या प्रमाणात गर्दी असते. अनेकांना ट्रेनच्या दरवाजात लटकत प्रवास करावा लागतो. यामुळे दरवर्षाला अडीच हजार प्रवाशांचा मृत्यू होतो किंवा ते जखमी होतात. ट्रेनमधील गर्दी कमी करण्यासाठी तसेच प्रवाशांना प्रवासामध्ये चांगल्या सुविधा देण्यासाठी एमयुटीपी प्रकल्प २ आणि ३ सुरु करण्यात आले आहेत. मात्र यासाठी गेल्या दोन ते अडीच वर्षात केंद्र आणि राज्य सरकारकडून योग्य प्रमाणात फंड देण्यात आलेला नाही. गेल्या काही वर्षात फंड योग्य प्रमाणात दिला जात नसल्याने हे प्रकल्प आजही पूर्ण झालेले नाहीत अशी माहिती रेल यात्री परिषदेचे अध्यक्ष सुभाष गुप्ता यांनी दिली.

एमयुटीपी प्रकल्पांसाठी निधी : केंद्र सरकारकडून रेल्वे आणि देशाचे असे दोन प्रकारचे बजेट जाहीर केले जात होते. गेल्या काही वर्षात एकच बजेट जाहीर केले जाते. यामध्ये रेल्वेच्या बजेटसाठी ५ ते १० मिनिटे दिली जातात. या बजेटमध्ये एमयुटीपी प्रकल्पांसाठी दिला जाणारा फंड यायला हवा. प्रवाशांना सुविधा देताना त्यांच्या सुरक्षेची काळजी घेणे गरजेचे आहे. त्यासाठी आरपीएफ जवानांची विशेष करून महिला जवानांची भरती करणे गरजचे आहे. रेल्वेमधील अपघात रोखण्यासाठी योजना आखण्याची गरज असल्याचे गुप्ता यांनी सांगितले.

काय आहेत एमयुटीपी प्रकल्प : छत्रपती शिवाजी महाराज टर्मिनस ते कुर्ला ५ वी, ६ वी लाईन ६५९ कोटी खर्च. ठाणे ते दिवा पेअर लाईन १३३ कोटी. बोरिवली ते मुंबई सेंट्रल ६ वी लाईन ५२२ कोटी खर्च. गोरेगाव पर्यंत हार्बर लाईनची सेवा वाढवणे १०३ कोटी खर्च. १९१ ट्रेन एसी. लांब पल्ल्याच्या एक्सप्रेस गाड्यांसाठी कल्याण येथे सुविधा निर्माण करणे. कल्याण ते आसनगाव दरम्यान ४ थी रेल्वे लाईन. कल्याण आणि बदलापूर दरम्यान ३ री आणि ४ थी लाईन असे प्रकल्प आहेत.

हेही वाचा : Union Budget 2023: केंद्रीय अर्थसंकल्पाकडून बांधकाम क्षेत्राला कोणत्या आहेत अपेक्षा?