मुंबई - सत्तेतील सहयोगी पक्षाकडून एका मागोमाग होणाऱ्या मागण्या मुख्यमंत्री उद्धव ठाकरे मान्य करत आहेत. आता 'महापोर्टल'ला स्थगिती देण्याचा निर्णय घेण्यात आला आहे. राज्याच्या कानाकोपऱ्यात शासकीय विभागाच्या परीक्षा या पोर्टलद्वारे होत होत्या. मात्र, या पोर्टलच्या अचुकतेविषयी अनेक परिक्षार्थींनी शंका उपस्थित केल्या होत्या. तसेच अनेक जिल्ह्यात या पोर्टलला स्थगिती देण्याच्या मागणीसाठी आंदोलनही करण्यात आले होते.
या पार्श्वभूमीवर राष्ट्रवादीच्या नेत्या खासदार सुप्रिया सुळे यांनी ट्विट करत महापोर्टलवर बंदी घालण्याची मागणी केली होती. दरम्यान, आरेच्या मेट्रो कारशेडला स्थगिती दिल्यानंतर आरेच्या आंदोलनकर्त्यांवर दाखल झालेले गुन्हे मागे घेण्याची मागणी राष्ट्रवादीचे नेते जितेंद्र आव्हाड यांनी केली होती. ही मागणीही मुख्यमंत्री ठाकरे यांनी मान्य केली होती.
हेही वाचा - VIDEO : अन् 'तिने' शिकवला छेड काढणाऱ्यास चांगलाच धडा
महापरीक्षा पोर्टलद्वारे घेण्यात येणाऱ्या परीक्षा पद्धतीबाबतच्या त्रुटी दूर करण्याच्या अनुषंगाने सर्व उपाययोजना करण्यात येतील. तोपर्यंत पुढील आठवड्यात होणारी पशुसंवर्धन विभागातील पदभरती परीक्षा पुढे ढकलण्यात येत आहे. त्याचबरोबर त्रुटी दूर करून ही परीक्षा महापरीक्षा पोर्टलद्वारेच ऑनलाईनरित्या घेण्यात यावी, असे निर्देश मुख्यमंत्री उद्धव ठाकरे यांनी दिले आहेत.
हेही वाचा - प्रियकराच्या मदतीने वडिलांचा खून, सुटकेसमध्ये आढळले होते अवयव
महापरीक्षा पोर्टलच्या अनुषंगाने अनेक निवेदने, तक्रारी मुख्यमंत्री कार्यालयात करण्यात आल्या होत्या. या अनुषंगाने माहिती तंत्रज्ञान विभागाची आढावा बैठक मुख्यमंत्री ठाकरे यांच्या अध्यक्षतेखाली मंत्रालयात आयोजित करण्यात आली. यावेळी मंत्री एकनाथ शिंदे, सुभाष देसाई, जयंत पाटील, आमदार आदित्य ठाकरे, मुख्य सचिव अजोय मेहता यावेळी उपस्थित होते.
