मुंबई - चित्रकार हनीफ शेखला ( वय 33 ) मालवणी पोलिसांनी अटक केली आहे. त्याच्याकडून 200 रुपयांच्या बनावट नोटा जप्त करण्यात आल्या आहेत. मालवणी पोलिस ठाण्याचे वरिष्ठ पोलीस निरीक्षक शेखर भालेराव यांनी 60 हजार रुपयांच्या नोटा जप्त केल्याची माहिती दिली. जप्त केलेल्या नोटा तपासासाठी पाठवण्यात आल्याचे त्यांनी सांगितले.
मालवणी पोलिसांची कारवाई - छपाई मशिनच्या साहाय्याने भारतीय बनावट नोटा वितरीत करणाऱ्या हनिफला मालवणी पोलिसांनी अटक केली आहे. यासंदर्भात मालवणी पोलीस ठाण्यात भारतीय दंड संहिता कलम - ४८९ (अ), ४८९ (ब), ४८९ (क), ४८९ (ड), १२० (ब) अन्वये गुन्हा दाखल करण्यात आला आहे. अटक करण्यात आलेला आरोपी हनिफ शेख हा पालघर जिल्ह्यातील नायगाव येथील चिंचोटी परिसरातील करमल पाडा येथे राहतो. या प्रकरणात आणखी आरोपी असण्याची शक्यता आहे. त्यादृष्टीने मालवणी पोलीस तपास करत आहेत.
गुप्त बातमीद्वारे बनावट नोटांची माहिती - ५ जानेवारी रोजी सहाय्यक पोलीस निरीक्षक हसन मुलाणी, सहाय्यक पोलीस निरीक्षक शिवशंकर भोसले यांच्यासह सहाय्यक पोलीस निरीक्षक नीलेश साळुंके यांचे पोलीस पथक मालवणी पोलीस ठाण्याच्या हद्दीतील मालवणी अंबुजवाडी परिसरात गस्त घालत होते. त्यावेळी त्यांना गुप्त बातमीद्वारे बनावट नोटांची माहिती मिळाली होती.
सापळा रचून केली अटक : पोलिसांनी मिळालेल्या माहितीच्या आधारे सापळा रचून आरोपीच्या मुसक्या आवळल्या आहेत. आरोपी मालवणी परिसरात बनावट नोटा वितरीत करण्यासाठी रिक्षा पार्किंग, अंबुजवाडी येथे आला होता. त्यावेळी पोलिसांनी त्याला अटक केली. हनिफची झडती घेतली असता पोलिसांना साठ हजार रुपयांच्या भारतीय बनावट नोटा त्याच्याकडे आढळून आल्या आहेत. गुन्हा नोंद झाल्यानंतर त्याच्याकडील मोबाईल, बनावट नोटा छपाई करण्याकरीता लागणारे साहित्य जप्त करण्यात आले आहे.
जप्त करण्यात आलेला मुद्देमाल : आरोपी हनीफ शेखकडून 200 रुपयाच्या 300 बनावट नोटा, संगणक, कलर प्रिंटर, लॅमिलेशन मशिन, हेअर ड्रायर, कोरे बटर पेपर, एका बाजूने नोट छपाई केलेला पेपर, कटर, पट्टी, इंक, पेनड्राईव आणि कार्डरिडर मालवणी पोलिसांनी जप्त केले आहे.
याप्रकरणी अधिक तपास सहायक पोलीस निरीक्षक नीलेश साळुंके करीत आहेत. एपीआय हसन मुलाणी, एपीआय शिवशंकर भोसले, एपीआय नीलेश साळुंके, एएसआय माणिक मोरे,अनिल पाटील, सचिन पवार, अरुण राठोड, विलास आवाड, नीलेश कुरबुडे यांच्या पथकाने ही कारवाई केली.
