मुंबई - विश्वकरंडक स्पर्धेमध्ये भारतीय संघ 30 जून रोजी इंग्लंड विरुद्धच्या सामन्यात भगवी जर्सी घालून सामना खेळणार आहे. या भगव्या रंगामुळे राजकीय वातावरण तापले असून अल्पसंख्याक आमदारांनी या जर्सीबाबत नाराजी व्यक्त केली आहे. तर सत्ताधारी आमदारांनी राष्ट्रीय ध्वजातल्या भगव्या रंगावर नाराजी कसली? हा प्रश्न उपस्थित केला. एकूणच भगव्या रंगाच्या जर्सीमुळे राजकीय सामना रंगल्याचे पाहायला मिळत आहे.
पंतप्रधान नरेंद्र मोदी यांना भारत भगव्या रंगाचा करायचा आहे, त्याचाच हा एक भाग असल्याचे समाजवादी पक्षाचे अध्यक्ष अबू आझमी यांनी म्हटले आहे. भगवा रंग आपल्या झेंड्यात असला तरी त्यात हिरवा रंगही आहे, याची आठवण आझमी यांनी करून दिली आहे. मोदी यांच्या नेतृत्वात हा रंग बदल केला जातोय, या प्रकारामुळे खेळात राजकारण आणले जात असल्याचा आरोप काँग्रेसचे आमदार नसीम खान यांनी केला.
भारतीय क्रिकेट टीम आपल्याला भगव्या जर्सीत खेळतांना पाहायला मिळणार आहे. याचा सर्वांना आनंद झाला पाहिजे. मात्र, अबू आझमी यांच्याकडे कोणताही मुद्दा नसल्याने ते अशा प्रकारे रंगांचे राजकारण असल्याचे भाजप आमदार राम कदम म्हणाले.
भारताचा राष्ट्रीय ध्वज तिरंगा आहे. त्या तिरंग्यातही भगवा रंग आहे. मात्र, फक्त मतांच्या राजकारणासाठी भगव्या रंगाला विरोध दर्शवला जात असल्याचे सहकार राज्यमंत्री आणि शिवसेनेचे नेते गुलाब पाटील यांनी म्हटले आहे. जे लोक या रंगाला विरोध करत आहेत, त्यांच्या बुद्धीची कीव करावीशी वाटते, असेही पाटील यावेळी म्हणाले. खेळाचा राष्ट्रीय एकात्मतेशी संबंध जोडला जात असताना यात धार्मिक बाबी आणणे योग्य नसल्याचे मतही पाटील यांनी मांडले.
