मुंबई - बॉलीवूड अमली पदार्थ तस्करी प्रकरणी अमली पदार्थ विरोधी पथकाकडून (नार्कोटिक्स कंट्रोल ब्युरो) तपास केला जात आहे. दरम्यान मंगळवारी (दि. 8 डिसें.) रिगल महाकाला या अमली पदार्थ तस्कराला एनसीबीने अटक केल्यानंतर त्याच्याकडून चौकशीदरम्यान मिळालेल्या माहितीच्या आधारावर मुंबईतील अंधेरी, ओशिवरा या परिसरामध्ये छापेमारी करण्यात आली होती. या छापेमारीत मोठ्या प्रमाणात अमली पदार्थ व रोकड जप्त करण्यात आली असून एनसीबीने मोहम्मद अजम जुमान शेख यास पाच किलो चरससह अटक केली आहे.
13 लाख 51 हजारांची रोकडही जप्त
अटक करण्यात आलेल्या आरोपी मोहम्मद अजम जुमान शेख यांच्याकडून पाच किलो चरससह तब्बल 13 लाख 51 हजार रुपयांची रोकडही जप्त करण्यात आली आहे. ओशिवरा परिसरातील मिल्लत नगर येथे ही कारवाई करण्यात आली आहे. अभिनेत्री रिया चक्रवर्तीला अटक केल्यानंतर तिला जामीन मिळाला असला तरी तिच्यावर दाखल केलेल्या गुन्ह्याच्या संदर्भात एनसीबीकडून तपास केला जात होता. त्या तपासाच्या अनुषंगाने ही कारवाई करण्यात आली असून या आरोपीला अटक करण्यात आलेली आहे.
आंतरराष्ट्रीय बाजारपेठात प्रति किलो 40 ते 50 लाख रुपये आहे चरसची किंमत
रिगल महाकाला याच्याकडून एनसीबीने हस्तगत केलेल्या मलाला क्रीम हे अमली पदार्थ जगात सगळ्यात जास्त आवडीचे अमलीपदार्थ असल्याचे एनसीबीचे म्हणणे आहे. याच उत्पादन भारतातील हिमाचल प्रदेश येथे घेतल जाते. याची आंतरराष्ट्रीय बाजारात किंमत प्रति किलो 40 ते 50 लाख रुपये असल्याचे सांगितले जात आहे.
हेही वाचा - राज्यात 8 ते 10 दिवस पुरेल एवढा रक्तसाठा, रक्तसंक्रमण परिषदेमध्ये अधिकाऱ्यांची माहिती
हेही वाचा - आयुर्वेदिक सर्जरीविरोधात राज्यभरात डॉक्टरांची निदर्शने
