मुंबई - पेगासस फोन प्रकरण तापणार असल्याची चिन्हे दिसत आहे. या प्रकरणी आता इस्रायलमध्ये गेलेल्या मंत्रालयातील अधिकाऱ्यांची चौकशी होणार आहे. तसे आदेश राज्य सरकारकडून देण्यात आले आहेत. चौकशीमुळे प्रकरणातील धागेदोरे समोर येण्याची शक्यता आहे. त्यामुळे संबंधित अधिकाऱ्यांची धावपळ उडाली आहे.
राजकारण्यांसह पत्रकार, उद्योजक व इतर काही व्यक्तींचे मोबाईल पेगासस स्पायवेअरद्वारे हॅक करण्यात आल्याची माहिती समोर आल्यानंतर भारतात खळबळ उडाली आहे. मोदी सरकारही पेगासिस प्रकरणावरून अडचणीत आले आहे. पावसाळी अधिवेशनाच्या पहिल्या दिवसापासूनच विरोधकांनी या प्रकरणावरून सरकारला धारेवर धरले. महाराष्ट्रातही या स्पायवेअरच्या माध्यमातून हेरगिरी झाल्याचा दावा महसूल मंत्री बाळासाहेब थोरात यांनी केला. काँग्रेसचे प्रदेशाध्यक्ष नाना पटोले यांचे फोन टॅप झाल्याचे म्हटले. हे प्रकरण २०१७-१८ मधील असल्याचे ते म्हणाले.
हेही वाचा - राज्याला केंद्राकडून नाही मिळणार ओबीसींचा इम्पेरिकल डेटा? लोकसभेतील केंद्राच्या उत्तरामुळे झाले स्पष्ट!
काही अधिकारी रडारवर -
संसदीय अधिवेशनातही विरोधकांनी महाराष्ट्रातील नेत्यांचे फोन टॅप झाल्याचा दावा करत मोदी सरकारची कोंडी केली. आता 2019मध्ये फडणवीस सरकार काळात राज्य शासनातील काही अधिकारी निवडणूक निकाल लागल्यानंतर इस्त्रायलला गेल्याचे समोर आले आहे. त्यामुळे हा वाद चिघळला आहे. हे अधिकाऱ्यांना का आणि कशासाठी इस्त्रायल पाठवले होते? कोणी पाठवले होते? याची सविस्तर चौकशी करावी, असे निर्देश राज्याचे मुख्य सचिव सीताराम कुंटे यांनी प्रशासनाला दिल्याचे समजते. फडणवीस सरकार काळातील प्रकरण असल्याने फडणवीस देखील अडचणीत येण्याची शक्यता वर्तवली जात आहे.
फोन टॅपिंग प्रकरण गंभीर -
कॉंग्रेस प्रदेशाध्यक्ष नाना पटोले यांचे फोन २०१७ -१८ मध्ये टॅप झाले होते. आता जे प्रकरण देशपातळीवर समोर येत असून ते गंभीर आहे. देशातील महत्वाच्या व्यक्तींची माहिती शत्रू देशांकडे जाऊ शकते, असे राज्याचे महसूल मंत्री बाळासाहेब थोरात यांनी सांगितले. महाराष्ट्रातही फोन टॅपिंगचा मुद्दा प्रदेशाध्यक्ष नाना पटोले यांनी पावसाळी अधिवेशनात उचलून धरला होता.
पाळत ठेवल्याचा आरोप चुकीचा -
मुख्यमंत्री असताना कुणाचेही फोन टॅप केलेले नाहीत. महाराष्ट्रातून इस्रायलला गेलेल्या अधिकाऱ्यांचा दौरा पूर्वनियोजित होता. तेथील शेती आणि माध्यमे या विषयांचा अभ्यास करण्यासाठी ते गेले होते. निवडणूक निकालानंतर माहिती व जनसंपर्क खात्यातील अधिकारी गेले होते. त्यामुळे पाळत ठेवल्याचा आरोप चुकीचा आहे, असल्याचा खुलासा माजी मुख्यमंत्री तथा विरोधी पक्षनेते देवेंद्र फडणवीस यांनी केला आहे.
नोव्हेंबर 2019मध्ये दौरा -
नोव्हेंबर 2019 मध्ये मंत्रालयातील पाच अधिकारी इस्रायल दौऱ्यावर गेले होते. याचदरम्यान, भाजप-शिवसेनेमध्ये मुख्यमंत्रीपदावरुन रस्सीखेच सुरू होती. या गोंधळात दरम्यानच अभ्यास दौऱ्यासाठी हे अधिकारी इस्रायलच्या दौऱ्यावर गेले होते. त्यांच्या दौऱ्याचा अहवाल राज्य सरकारने मागवला आहे. पेगासस प्रकरण आणि मंत्रालयातील अधिकाऱ्यांचा इस्रायल दौरा यामध्ये काय संबंध आहे, हे या अहवालानंतर समोर येणार आहे.
