मुंबई - मुंबईत एकीकडे कोरोना विषाणूचा प्रसार होत असताना ( Corona Patients in Mumbai ) पावसाळी साथीच्या आजारांनी डोकेवर काढले होते. ( Viral Infection Mumbai ) यामुळे आरोग्य विभागावरील ताण व डोकेदुखी वाढली होती. मात्र, गेल्या डिसेंबर महिन्यात आढललेल्या रुग्णांच्या तुलनेत म्हणजे महिनाभरात मलेरिया, लेप्टो, गॅस्ट्रो, डेंग्यू या आजाराचे रुग्ण निम्म्याने घटले आहेत. त्यामुळे मुंबईकरांना काहीसा दिलासा मिळाला आहे.
आरोग्य विभागावर भार -
मुंबईत कोरोनाचा शिरकाव झाल्यापासून मुंबई महापालिकेचा कोरोना विरोधात लढा सुरु आहे. कोरोनाचे रुग्ण झपाट्याने वाढत असताना साथीच्या आजारांचा ताप वाढला. त्यामुळे आरोग्य विभागासमोर आव्हान उभे राहिले होते. डिसेंबर महिन्यापासून कोरोनाची तिसरी लाट आली. तिसऱ्या लाटेत पहिल्या आणि दुसऱ्या लाटेतील रुग्णसंख्येपेक्षा वाढ झाली. दिवसाला २० हजाराहून अधिक रुग्ण आढळून आले. रुग्णसंख्या वाढत असली तरी ९० टक्के रुग्ण घरीच राहून बरे होत होते. तरीही या रुग्णांना क्वारेंटाईन, आयसोलेशनमध्ये ठेवणे त्यांच्या प्राकृतीची चौकशी, तपासणी करणे, त्यांच्या चाचण्या करणे आदी कामाचा आरोग्य विभागवार भार वाढला आहे.
हेही वाचा - Mumbai Corona Update : मुंबईत सोमवारी १८५७ नव्या कोरोना रुग्णांची नोंद, ११ जणांचा मृत्यू
रुग्णसंख्या निम्म्याने घटली -
मात्र, सध्या साथीच्या आजारात घट झाली आहे. गेल्या वर्षी मागील डिसेंबर महिन्यांत मलेरियाचे २८८, तर या महिन्यात म्हणजे २३ जानेवारीपर्यंत ही संख्या निम्म्याने घटून १३० वर आली आहे. डिसेंबरमध्ये लेप्टोचे ०४ तर जानेवारीत १, डिसेंबरमध्ये डेंग्युचे ४० रुग्ण होते ही संख्या जानेवारीत ७ वर आली. गेल्या महिन्यात गॅस्ट्रोचे ४३३ रुग्णांची नोंद झाली होती. या महिन्य़ांत २०९ वर आली. तर डिसेंबरमध्ये हेपेटायटीसचे १३७ रुग्ण आढळले होते. २३ जानेवारीपर्यंत १८ रुग्णांची नोंद झाली आहे. चिकुन गुनियाचे रुग्ण डिसेंबरमध्ये १२ रुग्ण आढळले होते. ही संख्याही या महिन्यांत कमी होऊन १ वर आली आहे. त्यामुळे गेल्या महिन्याच्या तुलनेत या महिन्यात म्हणजे महिनाभरात साथीच्या आजारांच्या रुग्णांच्या संख्येत दुपटीने, तिपटीने घट झाल्याने मुंबईकरांना मोठा दिलासा मिळाला आहे.
१ ते २३ जानेवारी, रुग्णांची स्थिती -
मलेरिया - १३०
डेंग्यू - ०७
गॅस्ट्रो - २०९
हेपेटायटीस - १८
चिकुनगुनीया - ०१
लेप्टो - ०१
